சீட் தர மறுப்பு- அத்வானி உதவியாளர் ஹரீன் பதக் ஆதரவாளர்கள் அகமதாபாத்தில் பந்த்!

அகமதாபாத்: பாஜக மூத்த தலைவர் எல்.கே.அத்வானியின் உதவியாளர் ஹரீன் பதக்குக்கு சீட் தராததைக் கண்டித்து குஜராத்தின் அகமதாபாத் புறநகரில் முழு அடைப்புப் போராட்டம் நடத்தப்பட்டது.

லோக்சபா தேர்தலில் பாஜகவின் வேட்பாளர் பட்டியலுக்கு பல இடங்களில் கடும் எதிர்ப்பு எழுந்துள்ளது. ராஜஸ்தானின் பார்மர் தொகுதியை தர மறுத்ததால் அங்கு மூத்த தலைவர் ஜஸ்வந்த்சிங் சுயேட்சையாக போட்டியிடுகிறார்.

இதேபோல் குஜராத்தின் கிழக்கு அகமதாபாத் தொகுதியை அத்வானியின் உதவியாளர் ஹரீன் பதக் கேட்டிருந்தார். ஆனால் அவருக்கு சீட் தரப்படவில்லை. ஹரீன் பதக்குக்குப் பதிலாக மும்பையைச் சேர்ந்த நடிகர் பரேஷ் ராவலுக்கு போட்டியிட வாய்ப்பு அளிக்கப்பட்டது.

இதற்கு கடும் எதிர்ப்பு தெரிவித்து உள்ளூர் பாஜகவினர் இன்று கிழக்கு அகமதாபாத் லோக்சபா தொகுதிக்குட்பட்ட டேக்ஹம் பகுதியில் முழு அடைப்புப் போராட்டம் நடத்தினர். அப்போது நடத்தப்பட்ட போராட்டங்களில் பாஜக மேலிடத்துக்கு எதிராக முழக்கங்கள் எழுப்பப்பட்டன. பரேஸ் ராவலின் உருவபொம்மைகளும் எரிக்கப்பட்டன.

English summary

Gujarats Small Dehgam town which is part of Ahmedabad(East) Lok Sabha seat today observed bandh against candidature of Mumbai based actor Paresh Rawal on BJP ticket.