இந்துக்களே கான்களின் படங்களை பார்க்காதீங்க: பாஜக தலைவர் சாத்வி

டேராடூன்: பாலிவுட்டின் 3 கான்களும் காதல் ஜிஹாத்தை ஊக்குவிப்பதால் அவர்களின் படங்களை இந்துக்கள் புறக்கணிக்க வேண்டும் என்று பாஜக தலைவர் சாத்வி பிராச்சி தெரிவித்துள்ளார்.

உத்தரகண்ட் மாநிலம் டேராடூனில் நடந்த விஸ்வ இந்து பரிஷத் அமைப்பின் கூட்டத்தில் பாஜக தலைவர் சாத்வி பிராச்சி கலந்து கொண்டு உரை நிகழ்த்தினார். அப்போது அவர் கூறுகையில்,

பாலிவுட்டின் ஷாருக்கான், சல்மான் கான், ஆமீர் கான் ஆகியோரின் படங்களில் இருந்து நம் குழந்தைகளுக்கு நல்ல கருத்து எதுவும் கிடைப்பது இல்லை. அவர்கள் காதல் ஜிஹாத்தை ஊக்குவிக்கிறார்கள். அதனால் அவர்களின் படங்களை இந்துக்கள் புறக்கணிக்க வேண்டும். காதல் ஜிஹாத் என்பது விருப்பப்பட்டு பிற மதத்தவரை திருமணம் செய்வது இல்லை. மாறாக கட்டாயப்படுத்தி ஒருவரை மதம் மாற்றி திருமணம் செய்கிறார்கள். இந்து அமைப்புகள் இதை ஒரு நாளும் சகித்துக் கொள்ளாது என்றார்.

அதன் பிறகு அவர் செய்தியாளர்களிடம் கூறுகையில்,

ராகுல் காந்தி அண்மையில் மாயமானதால் அவரின் தாயும், தங்கையும் கவலை அடைந்தனர். அவர் அவர்களின் கவலையை புரிந்து கொண்டு இந்திய பெண்ணை மணக்க வேண்டும் என்றார்.

சாத்வி சர்ச்சைக்குரிய கருத்துகளை கூறுவது இது ஒன்றும் முதல் முறை அன்று என்பது குறிப்பிடத்தக்கது.

English summary

BJP leader Sadhvi Prachi told that Hindus should boycott the movies of 3 Khans of Bollywood as they promote love Jihad.