சீமாந்திரா: ஜெகன் கட்சி ஆட்சியை கைப்பற்றும்- 18 லோக்சபா தொகுதிகளில் வெல்லும்- கருத்து கணிப்பு

By Mathi

Updated: Monday, April 21, 2014, 13:53 [IST]

Subscribe to Oneindia Tamil

ஹைதராபாத்: சீமாந்திரா மாநில சட்டசபை தேர்தலில் ஜெகன் மோகன் ரெட்டி தலைமையிலான ஒய்.எஸ்.ஆர். காங்கிரஸ் கட்சி 105 முதல் 112 இடங்களைப் பெற்று ஆட்சி அமைக்கும் என்றும் 15 முதல் 18 லோக்சபா தொகுதிகளைக் கைப்பற்றும் என்றும் கருத்து கணிப்பு ஒன்று தெரிவித்துள்ளது.

ஹைதராபாத்தை தலைமையிடமாக கொண்டு செயல்படு "ஆரா" என்ற நிறுவனம் சீமாந்திரா மற்றும் தெலுங்கானாவில் சுமார் 25 ஆயிரம் வாக்காளர்களிடம் கருத்து கணிப்பை நடத்தி முடிவுகளை வெளியிட்டுள்ளது.

தேசிய ஊடகங்கள் அனைத்தும் சீமாந்திராவில் தெலுங்குதேசம் கட்சியே லோக்சபா தேர்தலில் அதிக இடங்களைக் கைப்பற்றும் என்று கூறி வரும் நிலையில் உள்ளூர் நிறுவனத்தின் கணிப்பு தலைகீழாக இருக்கிறது.

சீமாந்திரா சட்டசபை தொகுதிகள்..

ஆந்திர மாநிலம் இரண்டாகப் பிரிக்கப்பட்டதைத் தொடர்ந்து சீமாந்திராவுக்கு 175 சட்டசபை தொகுதிகள் ஒதுக்கீடானது. இங்கு ஆட்சி அமைக்க தேவையான பெரும்பான்மை 88 இடங்கள்.

ஜெகன் கட்சிக்கு 112

ஆரா அமைப்பு நடத்திய கருத்து கணிப்பில் ஜெகன் மோகன் ரெட்டியின் ஒய்.எஸ்.ஆர். காங்கிரஸ் கட்சிக்கு சீமாந்திராவில் 105 முதல் 112 இடங்கள் வரை கிடைக்கும் வாய்ப்பிருக்கிறதாம். இதனால் ஜெகன் கட்சியே ஆட்சி அமைக்கும் நிலை உருவாகுமாம்.

பாஜக- தெலுங்குதேசம் கட்சிக்கு..

சீமாந்திராவில் தெலுங்குதேசம், பாரதிய ஜனதா கட்சிக்கு 2வது இடம்.. அதாவது 55 முதல் 65 தொகுதிகள் வரை கிடைக்குமாம்..

காங்கிரஸ் கதி?

சீமாந்திராவில் காங்கிரஸ் கட்சி பலவாறாக பிளவுபட்டு இருக்கிறது. அம்மாநில முன்னாள் முதல்வர் கிரண்குமார் ரெட்டி தனிக்கட்சி தொடங்கிவிட்டார். பல காங்கிரசார் சுயேட்சைகளாக போட்டியிடுகின்றனர். தற்போதைய தேர்தலில் காங்கிரஸ் மற்றும் சுயேட்சைகளுக்கு மொத்தமே 10 முதல் 15 இடங்கள் கிடைக்கும் என்கிறது ஆரா.

சீமாந்திராவில் லோக்சபா தேர்தலிலும் ஜெகனுக்கு ஜே.

ஆந்திர மாநில பிரிவினைக்குப் பின்னர் சீமாந்திராவுக்கு 25 லோக்சபா தொகுதிகள் உண்டு. இந்த 25-ல் 15 முதல் 18 தொகுதிகளை ஜெகன் மோகன் ரெட்டியின் ஒய்.எஸ்.ஆர். காங்கிரஸே அள்ளிவிடுமாம்.