பிரதமர்தான் அமைச்சர்களை தேர்வு செய்ய வேண்டும்... தேசிய ஜனநாயகக் கூட்டணி
டெல்லி: யார் யார் அமைச்சராக வேண்டும். யாருக்கு என்ன துறை தர வேண்டும் என்பதை பிரதமர்தான் முடிவு செய்வார் என்று தேசிய ஜனநாயகக் கூட்டணியின் மூத்த தலைவரும், அகாலிதள தலைவருமான நரேஷ் குஜ்ரால் தெரிவித்துள்ளார்.
இதுகுறித்து அவர் கூறுகையில், அடுத்து பாஜக தலைவர் நரேந்திர மோடி தலைமையிலான அரசு அமையும்போது அவர்தான் பிரதமர் என்ற வகையில் அமைச்சர்களை முடிவு செய்ய முடியும். யாருக்கு என்ன துறை தர வேண்டும் என்று அவர்தான் முடிவு செய்ய முடியும்.
மாறாக இதற்காக ஒரு குழுவை அமைத்தால் அது குழப்பத்தில்தான் முடியும். நல்லாட்சி தருவதற்கான சூழலை அது உருவாக்காது.
மேலும் இப்படிப்பட்ட குழுக்கள் ஒரு பக்கவாட்டு அதிகார மையமாக மாறும் அபாயமும் உள்ளது. கடந்த கால அனுபவத்தை வைத்து இதைச் சொல்கிறேன்.
ஐக்கிய முற்போக்குக் கூட்டணி அரசு செய்த தவறுகளை தேசிய ஜனநாயகக் கூட்டணி செய்து விடக் கூடாது. அதைப் பார்த்து நாம் சரியாக செயல்பட முயிற்சிக்க வேண்டும். பக்கவாட்டு அதிகார மையங்களால்தான் ஐக்கிய முற்போக்குக் கூட்டணி குழப்பமான ஆட்சியைத் தந்ததற்குக் காரணம் என்பதையும் மறந்து விடக் கூடாது.
ஆளும் கூட்டணியில் இடம் பெறும் அனைத்துக் கட்சிகளின் அபிலாஷைகளையும் சீர் தூக்கிப் பார்த்து சிறந்த முடிவுகளை மோடி அரசு எடுக்க வேண்டும்.
மோடி அரசில் நான் எந்தத் துறையை வகிப்பேன் இப்போதே ஊகிக்க நான் விரும்பவில்லை. மேலும் நான் அமைச்சர் பதவிக்காக அலையவும் இல்லை. அது பிரதமரின் உரிமையாகும். அதில் யாரும் நெருக்கடி தர முடியாது, கூடவும் கூடாது.
மிகவும் பலவீனமான பிரதமராக இருந்த மன்மோகன் சிங்கைப் பார்த்து மோடி நிறைய கற்றுக் கொள்ளலாம். ஒரு பிரதமர் எப்படி இருக்கக் கூடாது என்பதற்கு சிங்தான் சிறந்த உதாரணம். அவரது செயல்பாடுகள், நாட்டின் பொருளாதாரம் முதல் பல துறைகளையும் பாதித்து விட்டது.
எனவே மோடி, முற்றிலும் திறமையான, தகுதியானவர்களையே அமைச்சர்களாக நியமிக்க வேண்டும் என்பது எனது எதிர்பார்ப்பு. அதில் சமரசத்திற்கும், சிபாரிசுக்கும் இடமே இருக்கக் கூடாது.
மேலும் தொழிலதிபர்கள், தொழில்நுட்பத்துறையினர் போன்றோர் அமைச்சர்களாகக் கூடாது. அது சரியாக இருக்காது. மாறாக அவர்களை ஆலோசகர்களாக மாற்றலாம்.
அரசு அமைந்ததும் முதல் முக்கியப் பணியாக பொருளாதாரத்தை சீரமைக்க வேண்டும். அதுதொடர்பான வெள்ளை அறிக்கையை 30 முதல் 40 நாட்களுக்குள் வெளியிட நடவடிக்கை எடுக்க வேண்டும் என்றார் அவர்.
Click it and Unblock the Notifications
Sign in with Google