பாஜக வேட்பாளராகும் முகமது ஷமி? மேற்கு வங்கத்தில் போட்டியிட வியூகம்.. வெளியான பரபரப்பு தகவல்
கொல்கத்தா: இந்திய கிரிக்கெட் அணியின் வேகப்பந்து வீச்சாளரான முகமது ஷமியை வரும் நாடாளுமன்ற தேர்தலில் மேற்கு வங்க மாநிலத்தில் களமிறக்க பாஜக காய்நகர்த்தி வருவதாக பரபரப்பான தகவல்கள் வெளியாகி உள்ளன.
இந்திய கிரிக்கெட் அணியின் முக்கிய வேகப்பந்து வீச்சாளராக இருப்பவர் முகமது ஷமி. சமீபத்தில் நடந்து முடிந்த 50 ஓவர் உலககோப்பை கிரிக்கெட் போட்டியில் முகமது ஷமி அசத்தினார். மொத்தம் அவர் 24 விக்கெட்டுகளை வீழ்த்தியிருந்தார். அதோடு உலககோப்பை கிரிக்கெட்டில் அதிக விக்கெட் வீழ்த்தியவர்கள் பட்டியலில் முகமது ஷமி முதலிடம் பிடித்தார்.
அதன்பிறகு அவருக்கு காயம் ஏற்பட்டது. இடது கணுக்கால் காயத்தால் அவதிப்பட்ட முகமது ஷமி அறுவை சிகிச்சை செய்தார். தற்போது அவர் ஓய்வில் உள்ளார். முகமது ஷமி விரைவில் பூரண குணமடைந்து இந்திய கிரிக்கெட் அணிக்கு திரும்ப வேண்டும் என ரசிகர்கள் வாழ்த்தி உள்ளனர்.
இந்நிலையில் தான் முகமது ஷமி பாஜக சார்பில் வரும் நாடாளுமன்ற தேர்தலில் போட்டியிட உள்ளதாக கூறப்படுகிறது. அதாவது முகமது ஷமியை வரும் நாடாளுமன்ற தேர்தலில் மேற்கு வங்க மாநிலத்தில் களமிறக்க பாஜக ஆலோசனை செய்து வருவதாக கூறப்படுகிறது. முகமது ஷமி சொந்த மாநிலம் உத்தர பிரதேசமாகும்.
ஆனாலும் கூட அவர் ரஞ்சி போட்டியில் மேற்கு வங்காளத்தை பிரதிநிதித்துவப்படுத்தும் பெங்கால் அணிக்காக தொடர்ந்து விளையாடி வருகிறார். மேலும் அந்த மாநிலத்தின் உள்ளூர் போட்டிகளிலும் அவர் பங்கேற்று வருகிறார். இதனால் முகமது ஷமிக்கு மேற்கு வங்க மாநிலத்தில் நல்ல செல்வாக்கு உள்ளது.
இதனை பயன்படுத்தி கொள்ள பாஜக விரும்புகிறது. அதன்படி முதற்கட்டமாக பாஜக தலைவர்கள் முகமது ஷமியை கட்சியில் இணையும்படி அணுகி உள்ளதோடு, கட்சியில் இணைந்தால் வரும் நாடாளுமன்ற தேர்தலில் போட்டியிட வாய்ப்பு வழங்குவதாகவும் தெரிவித்துள்ளதாக பரபரப்பான தகவல்கள் வெளியாகி உள்ளன. ஆனால் முகமது ஷமி தற்போதைய சூழலில் எந்த முடிவையும் எடுக்கவில்லை.
அதேவேளையில் மேற்கு வங்க மாநிலத்தில் வேட்பாளராக முகமது ஷமியை நிறுத்துவது பற்றி பாஜக தலைவர்கள் விவாதித்துள்ளனர். அப்போது அனைத்து தலைவர்களும் ஒருமனதாக முகமது ஷமியை கட்சிக்கு அழைத்து வரும்படி கூறியுள்ளனர். அதன்பிறகே மேலிடத்தின் ஒப்புதலுடன் முக்கிய தலைவர் முகமது ஷமியை அணுகி உள்ளதாகவும் தகவல்கள் வெளியாகி உள்ளது.
Click it and Unblock the Notifications
Sign in with Google