லோக்சபா தேர்தல் எக்ஸிட் போல்: வடகிழக்கை தக்கவைக்கும் பாஜக கூட்டணி! காங்கிரசுக்கு பின்னடைவு

திஸ்பூர்: லோக்சபா தேர்தல் நடந்து முடிந்துள்ள நிலையில், தேர்தலுக்கு பிந்தைய கருத்துக்கணிப்பு முடிவுகள் வெளியாகி வருகின்றன. இந்த கருத்துக்கணிப்பின்படி வடகிழக்கு மாநிலங்களில் பாஜக கூட்டணி தங்களது வெற்றியை தக்க வைத்துக்கொள்ளும் என்று தெரிய வருகிறது.

இந்த முறை மீண்டும் நரேந்திர மோடி பிரதமர் நாற்காலியில் அமர்வாரா? அல்லது இந்தியா கூட்டணி வலுவான போட்டி கொடுத்து ஆட்சியை கைப்பற்றுமா? என்கிற எதிர்பார்ப்புகள் தீவிரமடைந்துள்ளன. இந்த லோக்சபா தேர்தல் இரண்டு கட்சிகளுக்கும் மிக முக்கியமானதாகும்.

பாஜகவை பொறுத்த அளவில், மோடி மீண்டும் பிரதமரானால், நேருவுக்கு பிறகு தொடர்ந்து மூன்று முறை பிரதமராகும் தலைவர் என்கிற பெருமையை அவர் பெறுவார். அதேபோல, 2025ம் ஆண்டு பாஜகவின் தாய் அமைப்பான ஆர்எஸ்எஸ்-ன் நூற்றாண்டு விழா நடைபெறுகிறது. இதற்காக பாஜக ஆட்சிப்பொறுப்பில் இருக்க வேண்டியது முக்கியம்.

காங்கிரஸை பொறுத்த அளவில் ஆட்சியில் இல்லாத இந்த 10 ஆண்டுகளில் குலாம் நபி ஆசாத் தொடங்கி பல்வேறு தலைவர்கள் கட்சியை விட்டு விலகி சென்றுள்ளனர். பல மாநிலங்களில் ஆட்சியை காங்கிரஸ் இழந்திருக்கிறது. எனவே இந்த முறை மீண்டு வர வேண்டிய கட்டாயத்தில் கட்சி இருக்கிறது. எனவே ஆம் ஆத்மி, திரிணாமுல் காங்கிரஸ் என முரண்பட்ட கட்சிகளை இந்தியா கூட்டணி என இணைத்து தேர்தலை எதிர்கொண்டிருக்கிறது.

இப்படி இருக்கையில் கடந்த ஏப்ரல் மாதம் 19ம் தேதி தொடங்கிய லோக்சபா தேர்தல் 7 கட்டங்களாக நடந்து முடிந்துள்ளது. இன்று இறுதி கட்ட வாக்குப்பதிவு நடந்து முடிந்திருக்கிறது. இதனையடுத்து தற்போது தேர்தலுக்கு பிந்தைய கருத்துக்கணிப்பு முடிவுகள் வெளியாகியுள்ளன.

வாக்குச்சாவடிகளில் வாக்களித்துவிட்டு வரும் ஒவ்வொரு 10 வாக்காளர்களில் ஒருவரிடம், யாருக்கு வாக்களித்தீர்கள் என்கிற விவரம் கேட்கப்படும். அவர் கூற விரும்பும் பட்சத்தில் இப்படியாக தரவுகள் சேகரிக்கப்பட்டு பகுப்பாய்வு செய்து கருத்து கணிப்புகளாக வெளியிடப்படும். சி-வோட்டர், ஆக்சிஸ் மை இந்தியா, சிஎன்எக்ஸ் ஆகிய அமைப்புகள் கருத்துக்கணிப்பு நடத்தும் அமைப்புகளில் முக்கியமானதாக கருதப்படுகிறது. இது தவிர ஏராளமான மீடியாக்கள் கருத்துக்கணிப்பை வெளியிடுகின்றன.

அந்த வகையில் தற்போது வடகிழக்கு மாநிலங்களுக்கான தேர்தலுக்கு பிந்தைய கருத்துக்கணிப்புகள் வெளியாகியுள்ளன. அசாம் மாநிலத்திற்கான கருத்துக்கணிப்பை நியூஸ் 18 வெளியிட்டிருக்கிறது. இம்மாநிலத்தில் மொத்தமுள்ள 14 லோக்சபா தொகுதிகளில் பாஜக மற்றும் அதன் கூட்டணி கட்சிகள் 10-13 தொகுதிகளில் வெற்றி பெறும் என்று கணிக்கப்பட்டிருக்கிறது. அதேபோல இந்தியா கூட்டணி 2-5 தொகுதிகளிலும், ஒரு தொகுதியில் மற்ற கட்சிகள் ஜெயிக்க வாய்ப்பிருப்பதாக தெரிவித்திருக்கிறது.

சிஎன்பிசி டிவி 18 கணிப்பின்படி, பாஜக கூட்டணி கட்சிகள் 1-11 தொகுதிகளிலும், இந்தியா கூட்டணி 2-5 தொகுதிகளிலும் வெற்றி பெறும் என தெரிவிக்கப்பட்டிருக்கிறது.

அதேபோல இந்தியா டிவி - சிஎன்எக்ஸ் கருத்துக்கணிப்பின்படி, பாஜக கூட்டணி கட்சிகள் 9-10 தொகுதிகளிலும், இந்தியா கூட்டணி 1-2 தொகுதிகளிலும், அகில இந்திய ஐக்கிய ஜனநாயக முன்னணி 1 தொகுதியிலும் மற்றவை ஒரு தொகுதியிலும் வெற்றி பெறும் என தெரிவிக்கப்பட்டிருக்கிறது.

கடந்த 2019ல் பாஜக 9 தொகுதிகளிலும், காங்கிரஸ் 3 தொகுதிகளிலும், அகில இந்திய ஐக்கிய ஜனநாயக முன்னணி மற்றும் சுயேட்சை வேட்பாளர் தலா ஒரு தொகுதியில் வெற்றி பெற்றிருக்கிறார்கள்.

English summary

As the Lok Sabha elections are over, the results of the exit polls are coming out. According to this poll, it is clear that the BJP alliance will maintain its victory in the North-Eastern states.