காங்கிரஸ் கட்டிய பள்ளியில் தான் மோடியே படித்தார்.. கல்லூரி போனாரா? பிரியங்கா காந்தி ‛அட்டாக்’
போபால்: காங்கிரஸ் கட்டிய பள்ளியில் தான் பிரதமர் மோடி படித்தார். மோடி கல்லூரி சென்றாரா? இல்லையா? என்பது எனக்கு தெரியாது. ஆனால் அவரது பொலிடிக்கல் சயின்ஸ் சான்றிதழ் பிரிண்ட் செய்யப்பட்ட கம்ப்யூட்டர் காங்கிரஸ் அரசு வழங்கியது என பிரியங்கா காந்தி கடுமையாக விமர்சனம் செய்தார்.
மத்திய பிரதேச மாநில சட்டசபையின் காலம் முடிவுக்கு வர உள்ளது. இதனால் இந்திய தேர்தல் ஆணையம் தேர்தல் தேதியை அறிவித்துள்ளது. அதன்படி மத்திய பிரதேசத்தில் உள்ள 230 சட்டசபை தொகுதிகளுக்கும் ஒரே கட்டமாக நவம்பர் 17 ம் தேதி தேர்தல் நடைபெற உள்ளது.
இந்த தேர்தலில் பதிவாகும் ஓட்டுக்கள் டிசம்பர் 3ம் தேதி எண்ணப்பட்டு முடிவுகள் அறிவிக்கப்பட உள்ளது. மத்திய பிரதேசத்தை பொறுத்தமட்டில் பாஜக, காங்கிரஸ் இடையே தான் நேரடி போட்டி நிலவுகிறது.
மத்திய பிரதேசத்தில் மொத்தம் 230 சட்டசபை தொகுதிகள் உள்ளன. இங்கு ஆட்சியை பிடிக்க வேண்டும் என்றால் ஒரு கட்சி 116 தொகுதிகளில் வெற்றி பெற வேண்டும். தற்போது அங்கு பாஜகவின் ஆட்சி நடக்கிறது. முதல்வராக சிவ்ராஜ் சிங் சவுகான் உள்ளார். இந்நிலையில் தான் பாஜகவை வீழ்த்தி மீண்டும் அரியணை ஏற காங்கிரஸ் திட்டமிட்டு பிரசாரங்களை மேற்கொண்டு வருகிறது.
இந்நிலையில் தான் மத்திய பிரதேச மாநிலம் இந்தூரில் காங்கிரஸ் கட்சியின் பொதுச்செயலாளர் பிரியங்கா காந்தி பிரசாரம் செய்தார். மேலும் அங்கு நடந்த பொதுக்கூட்டத்தில் அவர் பேசினார். அப்போது அவர் காங்கிரஸ் கட்டிய பள்ளியில் தான் பிரதமர் மோடி படித்தார் என கூறினார். இதுதொடர்பாக பிரியங்கா காந்தி கூறியதாவது:
இந்தியா சுதந்திரம் பெற்ற பிறகு கடந்த 70 ஆண்டுகளாக எந்த முன்னேற்றமும் இல்லை என அவர்கள் (பாஜக) கூறுகின்றனர். காங்கிரஸ் கட்சியை விமர்சனம் செய்வதற்காக இதனை அவர்கள் கூறுகின்றனர். ஒருவேளை 70ஆண்டுகளில் பள்ளிகள் இல்லாமல் இருந்தால் பிரதமர் மோடி எப்படி ஸ்கூல் சென்றிருப்பார்? அவர் சென்ற பள்ளியே காங்கிரஸ் கட்டியது தான்.
ஆனால் அவர் கல்லூரி சென்றாரோ? இல்லையோ? என்பது எனக்கு தெரியவில்லை. ஒருவேளை அவர் கல்லூரி சென்றிருந்தால் அதுவும் காங்கிரஸ் கட்சி கட்டியதாக தான் இருந்திருக்கும். ஆனால் ஒன்றை என்னால் கூற முடியும். அவரது ‛பொலிடிக்கல் சயின்ஸ்' சான்றிதழ் பிரிண்ட் செய்த கம்ப்யூட்டர் காங்கிரஸ் அரசு கொடுத்தது தான்'' என்றார்.
Click it and Unblock the Notifications
Sign in with Google