மாவோயிஸ்டுகள் ஹிட் லிஸ்ட்டில் முதலிடத்தில் மமதா பானர்ஜி

கொல்கத்தா: மாவோயிஸ்டுகளின் ஹிட் லிஸ்ட்டில் முதலிடத்தில் மேற்கு வங்க முதல்வரும், திரிணாமூல் காங்கிரஸ் தலைவருமான மமதா பானர்ஜியின் பெயர் இருப்பதாக தகவல் கிடைத்துள்ளது.

மாவோயிஸ்டுகள் யார், யாரை தாக்குவது என்று தயாரித்துள்ள பட்டியலில் மேற்கு வங்க முதல்வரும், திரிணாமூல் காங்கிரஸ் தலைவருமான மமதா பானர்ஜியின் பெயர் முதலிடத்தில் இருப்பதாக தகவல் கிடைத்துள்ளது. இது மமதாவுக்கும் தெரியுமாம்.

இந்நிலையில் இது குறித்து மமதா கூறுகையில்,

மாவோயிஸ்டுகளின் ஹிட் லிஸ்ட்டில் என் பெயர் தான் முதலில் இருக்கிறது என்று கேள்விப்பட்டேன். அவர்களுக்கு தைரியம் இருந்தால் வரட்டும். அவர்களை கண்டு நான் அஞ்சவில்லை. நான் ஜங்கள்மஹால் செல்வதை யாராலும் தடுக்க முடியாது. நான் மேம்பாட்டு திட்டங்களை நிறைவேற்ற ஜங்கள்மஹாலுக்கு ஆயிரம் தடவை செல்வேன்.

நாங்கள் ஜங்கள்மஹாலில் ஏராளமானோரை போலீஸ் படையில் சேர்த்துள்ளோம். மாவோயிஸ்டுகளின் தாக்குதலில் பலியான ஜவான்களுக்கு நினைவிடம் கட்டுமாறு போலீஸ் நிர்வாகத்திற்கு உத்தரவிட்டுள்ளேன் என்றார்.

ஜங்கள்மஹால் மாவோயிஸ்டுகளின் கட்டுப்பாட்டில் இருந்து வந்தது. தற்போது அங்கு மாவோயிஸ்டுகளுக்கும் மத்திய பாதுகாப்பு படையினருக்கும் இடையே தொடர்ந்து மோதல் ஏற்பட்டு வருகிறது என்பது குறிப்பிடத்தக்கது.

English summary

West Bengal CM and ruling Trinamool Congress president Mamata Banerjee is on the top of Maoist hit-list, reports said.