அதிருப்தி பாஜக தலைவர்களுடன் மமதா பானர்ஜி இன்று சந்திப்பு
பிரதமர் மோடியை கடுமையாக விமர்சிக்கும் பாஜக அதிருப்தி தலைவர்களை மமதா பானர்ஜி இன்று சந்திக்கிறார்.
டெல்லி: பாஜகவுக்கு எதிராக வலிமையான கூட்டணியை உருவாக்குவதற்காக டெல்லியில் முகாமிட்டுள்ளார் மேற்கு வங்க முதல்வரும் திரிணாமுல் காங்கிரஸ் தலைவருமான மமதா பானர்ஜி. இன்று பாரதிய ஜனதா கட்சியின் அதிருப்தி தலைவர்களான சத்ருகன் சின்ஹா, யஸ்வந்த் சின்ஹா, அருண்சோரி ஆகியோரையும் மமதா சந்தித்து பேசுகிறார்.
தேசிய அளவில் பாஜகவை வீழ்த்த வலிமையான அணியை உருவாக்கும் முயற்சிகள் தீவிரம் அடைந்துள்ளன. டெல்லி சென்றுள்ள மமதா பானர்ஜி, தேசியவாத காங்கிரஸ், சிவசேனா, திமுக. தெலுங்கானா ராஷ்டிரிய சமிதி தலைவர்களை சந்தித்து பேசினார்.
இன்றும் பல்வேறு அரசியல் கட்சித் தலைவர்களை மமதா பானர்ஜி சந்தித்து பேசுகிறார். பாஜகவில் பிரதமர் மோடியை மிகக் கடுமையாக விமர்சித்து வரும் சத்ருகன் சின்ஹா, யஸ்வந்த் சின்ஹா, அருண்சோரி ஆகியோரையும் மமதா சந்தித்து ஆலோசனை நடத்துகிறார்.
காங்கிரஸ் மூத்த தலைவர் சோனியா காந்தி உடல்நலம் தேறிய பின்னர் அவரை சந்திக்க இருப்பதாகவும் மமதா பானர்ஜி தெரிவித்திருந்தது குறிப்பிடத்தக்கது.