எப்புட்றா? குஜராத்தில் 5 ஆண்டில் டபுள் ஆன கோடீஸ்வரர்கள் எண்ணிக்கை! பிரதமர் மோடி மாநிலமாச்சே

காந்திநகர்: குஜராத் மாநிலத்தில் வாழும் கோடீஸ்வரர்களின் எண்ணிக்கை ஒரே ஆண்டில் 49% அதிகரித்து இருக்கிறது.

பிரதமர் நரேந்திர மோடியின் சொந்த மாநிலம் குஜராத். வைர வியாபாரம், கப்பல் உடைக்கும் தொழிற்சாலை, சூரத் துணி வியாபாரம் என பல தொழில்கள் அங்கு கொடிகட்டிப் பறக்கின்றன. அதிக ஜிடிபி கொண்ட மாநிலங்களில் தமிழ்நாட்டுக்கு அடுத்தபடியாக இந்திய அளவில் மூன்றாவது இடத்தில் குஜராத் உள்ளது.

இந்த நிலையில் குஜராத்தில் ரூ.1 கோடிக்கு மேல் வருவாய் ஈடுவோர் பட்டியலை மத்திய நேரடி வரிகள் வாரியத்தின் சிபிடிடி வெளியிட்டு இருக்கிறது. அதன்படி கடந்த 2021 - 22 ஆம் நிதியாண்டில் குஜராத்தை சேர்ந்த 9,300 பேர் ரூ.1 கோடிக்கும் அதிகமாக வருவாய் ஈட்டியதாக தங்களுடைய வருமான வரி படிவத்தை குறிப்பிட்டு உள்ளார்கள்.

இந்த நிலையில் கடந்த 2022 - 23 நிதியாண்டில் குஜராத்தை சேர்ந்தவர்கள் தாக்கல் செய்த வருமான வரி படிவத்தின் அடிப்படையில் ரூ.1 கோடிக்கும் அதிகமாக வருவாய் ஈட்டியவர்கள் எண்ணிக்கை 4,500 என்ற அளவில் அதிகரித்து 13,800 பேர் ரூ.1 கோடிக்கும் அதிகமாக வருவாய் ஈட்டுவதாக குறிப்பிட்டு இருக்கிறார்கள்.

கடந்த 5 ஆண்டுகளுக்கு முன்பாக குஜராத்தில் ரூ.1 கோடிக்கும் அதிகமாக வருவாய் ஈட்டுபவர்கள் எண்ணிக்கை 7,000 என்ற அளவில்தான் இருந்தது. ஆனால், தற்போது 5 ஆண்டுகளில் இந்த எண்ணிக்கை இரு மடங்காக அதிகரித்து இருக்கிறது. அதேபோல் கார்ப்பரேட் நிறுவன பிரிவில் மட்டும் ஆயிரத்துக்கும் அதிகமானோர் கோடீஸ்வரர்களாகி உள்ளார்கள்.

கடந்த 2021 - 22 நிதியாண்டில் கார்ப்பரேட் நிறுவன கோடீஸ்வரர்களின் எண்ணிக்கை 3,700 ஆக இருந்த நிலையில், 2022 - 23 நிதியாண்டில் 28 சதவீதம் அதிகரித்து 4,700 ஆக உயர்ந்து உள்ளது. அதேபோன்று குஜராத் மாநிலத்தில் கடந்த 2021 - 22 நிதியாண்டில் வருமான வரி செலுத்திய தனிநபர்களின் எண்ணிக்கையும் 71.2 லட்சமாக இருந்த நிலையில், 2022 - 23 நிதியாண்டில் இது 73.8 லட்சமாக அதிகரித்து உள்ளது. இது 4% உயர்வு என அந்த சிபிடிடி கூறியுள்ளது.

English summary

The number of millionaires living in the state of Gujarat has increased by 49% in a single year.