"கூகுளில்" மோடியைவிட செல்வாக்குடன் திகழும் ராகுல் காந்தி

டெல்லி: கூகுளில் அதிகம் தேடப்பட்டவர்களில் பாஜகவின் பிரதமர் வேட்பாளர் மோடிக்கு சற்றும் சளைக்காதவராகவே காங்கிரஸ் துணை தலைவர் ராகுல் காந்தி திகழ்கிறார்.

கடந்த 2010ம் ஆண்டு ஜனவரி மாதம் முதல் கடந்த நவம்பர் மாதம் வரை கூகுளில் பாஜக பிரதமர் வேட்பாளர் நரேந்திர மோடி மற்றும் காங்கிரஸ் துணை தலைவர் ராகுல் காந்தி ஆகியோர் குறித்து எத்தனை பேர் தேடி இருக்கின்றனர் என்று ஆய்வு செய்யப்பட்டது.

இதில் மாநிலம் மற்றும் நகரங்கள் வாரியாக மோடி, ராகுல் குறித்து கூகுளில் தேடியோர் விவரம் சேகரிக்கப்பட்டது. இதில் குஜராத்தில் மோடி குறித்து ஏராளமானோர் தேடியிருக்கின்றனர். இதே போன்று ராகுல் பற்றி உத்தரகண்டில் ஏராளமானோர் கூகுளில் தேடியுள்ளனர்.

ஒரு சில மாநிலங்களில் அதிகம் தேடப்பட்டவராக இருக்கும் மோடி பல மாநிலங்களில் மிகவும் குறைவான அளவே தேடப்பட்டிருக்கிறார். ஆனால் ராகுல் அப்படி இல்லையாம். ராகுல் அனைத்து மாநிலங்களிலுமே குறைந்தது 58 சதவீதம் பேரால் தேடப்பட்டிருக்கிறார். அதாவது மாநிலங்களிலும் ராகுல் மோடியை விட பிரபலமாகவே 'கூகுளில்' உள்ளார்.

இந்நிலையில் ஃபேஸ்புக்கில் அதிகம் கருத்து தெரிவிக்கப்பட்ட அரசியல் தலைவராகவும் மோடி உள்ளார். மேலும் ட்விட்டரில் 2.8 மில்லியன் பாலோயர்களுடன் மிகவும் பிரபலமான அரசியல் தலைவராக மோடி உள்ளார். ஃபேஸ்புக்கில் மோடியை 6.5 மில்லியன் பேர் லைக் செய்துள்ளனர்.

English summary

According to the data from Google Trends congress vice president is equally popular in all states while BJP's PM candidate Modi is popular in selected sates.