மத்தியில் பாஜக ஆட்சிதான்.. எக்ஸிட் போல் முடிவுகள் திட்டவட்டம்

By Mathi

Published: Tuesday, May 13, 2014, 12:56 [IST]

Subscribe to Oneindia Tamil

டெல்லி: லோக்சபா தேர்தலில் பாரதிய ஜனதா கட்சியே அதிக இடங்களைக் கைப்பற்றும் என்று அனைத்து தேர்தலுக்குப் பிந்தைய கருத்து கணிப்பான எக்ஸிட் போல் முடிவுகள் தெரிவிக்கின்றன.

16வது லோக்சபா தேர்தலுக்கான வாக்குப் பதிவு நேற்று முடிவடைந்த நிலையில் ஊடகங்கள் எக்ஸிட் போல் முடிவுகளை வெளியிட்டன. இதில் அனைத்துமே பாரதிய ஜனதா தலைமையிலான தேசிய ஜனநாயகக் கூட்டணிதான் மத்தியில் ஆட்சியை அமைக்கும் என்று தெரிவித்துள்ளன.

சி.என்.என்.ஐ.பி.என்

சி.என்.என்.ஐ.பி.என்- சி.எஸ்.டி.எஸ்.- லோக்நிதி இணைந்து நடத்திய கருத்து கணிப்பில் பார்திய ஜனதா தலைமையிலான தேசிய ஜனநாயகக் கூட்டணி 270 முதல் 282 இடங்களைக் கைப்பற்றும் எனத் தெரிவித்திருந்தது. இதில் பாஜக மட்டுமே 230-242 இடங்களைக் கைப்பற்றுமாம். காங்கிரஸ் தலைமையிலான ஐக்கிய முற்போக்குக் கூட்டணியோ 92 முதல் 102 இடங்களைத்தான் கைப்பற்றுமாம்.

ஏ.பி.பி. நியூஸ்

ஏ.பி.பி. நியூஸ்- நீல்சன் நிறுவனம் வெளியிட்ட எக்ஸிட் போலிலும் பாரதிய ஜனதா தலைமையிலான தேசிய ஜனநாயகக் கூட்டணி 281 இடங்களிலும் காங்கிரஸ் தலைமையிலான ஐக்கிய முற்போக்குக் கூட்டணி 97 இடங்களையும் கைப்பற்றும் எனத் தெரிவிக்கப்பட்டுள்ளது.

டைம்ஸ் நவ்

டைம்ஸ் நவ்- ஓஆர்ஜி இணைந்து நடத்திய எக்ஸிட் போல் முடிவில் பாரதிய ஜனதா தலைமையிலான தேசிய ஜனநாயகக் கூட்டணிக்கு 249 இடங்கள் கிடைக்கும். காங்கிரஸ் தலைமையிலான ஐக்கிய முற்போக்குக் கூட்டணிக்கு 148 இடங்கள் கிடைக்கும் என தெரிவிக்கப்பட்டிருக்கிறது.

இந்தியா டிவி- நியூஸ் எக்ஸ்

இந்தியா டிவி மற்றும் நியூஸ் எக்ஸ் தொலைக்காட்சிகளோ பாஜக தலைமையிலான அணிக்கு 289 இடங்கள் கிடைக்கும் என்கிறது.

சி வோட்டர்

சி வோட்டர் நடத்திய கருத்துக் கணிப்பிலும் பாஜக அணிக்கு 289 இடங்கள் கிடைக்கும் என்று தெரிவிக்கப்பட்டிருக்கிறது. காங்கிரஸ் அணிக்கோ 101 இடங்கள்தான் கிடைக்குமாம்.

இந்தியா டுடே

இந்தியா டுடேவின் எக்ஸிட் போலில் பாஜக அணிக்கு 261-283 இடங்கள் கிடைக்குமாம். இப்படி அனைத்து எக்ஸிட் போல் முடிவுகளுமே மத்தியில் பாரதிய ஜனதா தலைமையிலான ஆட்சிதான் அமையும் என்று அடித்துக் கூறுகின்றன.