திரிபுராவில் பாஜக ஆட்சி, மேகாலயாவில் தொங்கு சட்டசபை, நாகாலாந்தில் என்டிபிபி கூட்டணி ஆட்சி- Live

வடகிழக்கு மாநிலங்களான நாகாலாந்து, திரிபுரா, மேகாலயாவில் ஆட்சியை பிடிக்கப்போவது யார்? என்று இன்று நடைபெறும் வாக்கு எண்ணிக்கையில் தெரியவரும்.

டெல்லி: வடகிழக்கு மாநிலங்களான நாகாலாந்து, திரிபுரா, மேகாலயாவில் சட்டசபை தேர்தலையொட்டி பதிவு செய்யப்பட்ட வாக்குகள் இன்று எண்ணப்படுகின்றன.

திரிபுரா, மேகாலயா, நாகாலாந்து மாநிலங்களுக்கு நடந்த சட்டசபை தேர்தலில் பதிவான ஓட்டுகள் பலத்த பாதுகாப்புடன் எண்ணத் துவங்கியுள்ளன. முதலில் தபால் ஓட்டுகளை எண்ணும் பணியானது தொடங்கியுள்ளது.

தலா 60 உறுப்பினர்களை கொண்ட திரிபுரா, மேகாலயா, நாகாலாந்து ஆகிய 3 வடகிழக்கு மாநில சட்டசபைகளின் ஆயுட்காலம் முடிவடைவதையொட்டி தேர்தல் அறிவிக்கப்பட்டது. திரிபுராவில் 59 தொகுதிகளுக்கு கடந்த 18-ந்தேதி நடைபெற்ற தேர்தலில் 74 சதவீத ஓட்டுகள் பதிவாகின.

மேகாலயாவின் 59 தொகுதிகளுக்கும் நாகாலாந்தின் 59 தொகுதிகளுக்கும் கடந்த 27-ந்தேதி தேர்தல் நடந்தது. இதில் மேகாலயாவில் 67 சதவீதமும், நாகாலாந்தில் 75 சதவீதமும் ஓட்டுகள் பதிவானது.

திரிபுராவில் மார்க்சிஸ்ட் கம்யூனிஸ்டு வேட்பாளர் ஒருவர் மரணம் அடைந்ததாலும் மேகாலயாவில் தேசியவாத காங்கிரஸ் வேட்பாளர் கொல்லப்பட்டதாலும் தலா ஒரு தொகுதியில் தேர்தல் ஒத்திவைக்கப்பட்டது. நாகாலாந்தை பொறுத்தவரை வடக்கு அங்காமி-2 தொகுதியில் போட்டியிட்ட தேசியவாத ஜனநாயக முற்போக்கு கட்சி தலைவர் நெய்பியூ ரியோ போட்டியின்றி வெற்றி பெற்றுவிட்டதால் எஞ்சிய 59 தொகுதிகளுக்கு தேர்தல் நடந்தது.

இந்த 3 மாநிலங்களிலும் பதிவான வாக்குகள் இன்று எண்ணப்படுகின்றன. வாக்கு எண்ணிக்கையின் முடிவில் ஆட்சியை கைபற்றப்போவது யார் என்பது தெரியவரும்.

English summary

Meghalaya, Tripura, Nagaland Assembly election result: Counting of votes begins at 8 am today amid high security.