இந்தியாவின் மிகப் பிரபலமான தலைவர் மோடிதான்!- கருத்துக் கணிப்பு முடிவு

டெல்லி: இந்தியாவின் மிகவும் பிரபலமான தலைவராக பிரதமர் நரேந்திர மோடி திகழ்வதாக கருத்துக் கணிப்பு ஒன்றில் தெரிய வந்துள்ளது.

ஏபிபி நியூஸ் - நீல்சன் அமைப்பு மேற்கொண்ட இந்த கருத்துக் கணிப்பில் 58 சதவீதம் பேர், மோடியை இந்தியாவின் மிகப் பிரபல தலைவர் என்று தெரிவித்துள்ளனர்.

மேலும் பா.ஜ.க., தலைமையிலான அரசின் செயல்பாட்டில் கணிசமான அளவில் முன்னேற்றம் ஏற்பட்டுள்ளதாகவும் கருத்துக் கணிப்பில் தெரியவந்துள்ளது.

இப்பவே தேர்தல் வைத்தாலும்

கருத்துகணிப்பின் படி தற்போது மக்களவை தேர்தல் நடைபெற்றாலும் தேசிய ஜனநாயகக் கூட்டணி 38 சதவீதம் வாக்குகளை பெறும் என்றும் 301 தொகுதிகளை கைப்பற்றும் என்றும் கூறப்படுகிறது.

காங்கிரசுக்கு 108தான்

காங்கிரஸ் தலைமையிலான ஐக்கிய முற்போக்கு கூட்டணி 28 சதவீதம் வாக்குகளை பெறும். 108 தொகுதிகளில் வெற்றி பெறும். கடந்த தேர்தலில் காங்கிரஸ் கூட்டணி 62 இடங்களை மட்டுமே கைப்பற்றி இருந்தது.

செல்வாக்கு குறைவதும் உண்மைதான்

47 சதவீதம் மக்கள் பிரதமர் நரேந்திர மோடியின் புகழ் நாளுக்கு நாள் குறைந்து வருவதாக கூறியுள்ளனர். பிரதமராக மோடியின் செயல்பாடு குறித்த கேள்விக்கு 17 சதவீதம் பேர் மிகவும் நன்றாக உள்ளதாகவும், 30 சதவீதம் பேர் நன்றாக உள்ளதாகவும். அதே 30 சதவீதம் பேர் சுமார் என்றும் கருத்து தெரிவித்துள்ளனர்.

தாத்ரி படுகொலை

தாத்ரி படுகொலை சம்பவம் குறித்து மோடி பேசியிருக்க வேண்டுமா என்ற கேள்விக்கு ஆம் என்று 57 சதவீதம் பேர் வாக்களித்துள்ளனர். 27 சதவீதம் பேர் தேவையில்லை என்றும் கூறியுள்ளனர்.

ராமர் கோயில் கட்டலாம்

65 சதவீதம் பேர் மோடி அரசு ராமர் கோவில் கட்டுவது தொடர்பாக முதற்கட்ட நடவடிக்கையை எடுக்க வேண்டும் என்று தெரிவித்துள்ளனர்.

மக்கள் மனநிலையைத் தெரிந்து கொள்வதற்கான கருத்துக் கணிப்பு இது என்று ஏபிபி நியூஸ் - நீல்சன் அமைப்பு தெரிவித்துள்ளது.

English summary

Prime Minister Narendra Modi is the most popular leader in the country, as per an opinion poll.