"பீர்" விலை அடிப்படையில்.... “கேளிக்கை” நகரங்களில் டெல்லிக்கு 25வது இடம்!

டெல்லி: உலக அளவில் கேளிக்கைக்கு உகந்த நகரங்களில் டெல்லி 25 ஆவது இடம் பெற்றுள்ளது.

இப்பட்டியலில் முதல் இடத்தை ஜெர்மனியின் தலைநகர் பெர்லின் தட்டிச்சென்றுள்ளது. இதுபற்றி ஆய்வு மேற்கொண்ட "கோ யூரோ" நிறுவனம் வெளியிட்டுள்ள செய்தி குறிப்பில், "உலக அளவில் கேளிக்கைகளுக்கு ஏற்ற நகரம் எது என்பதை கண்டறிய "கெட் யுவர் ஓன் கைட்" மற்றும் "கோ யூரோ" ஆகிய இரு டிராவல் நிறுவனங்களும் இணைந்து ஆய்வு ஒன்றை நடத்தியது.

இந்த ஆய்விற்காக உலகின் 1,800 நகரங்கள் தேர்ந்தெடுக்கப்பட்டு அங்கு ஆய்வுகள் மேற்கொள்ளப்பட்டது. ஆய்வில், இரவு வாழ்க்கை, பீர் பாட்டில்களின் சராசரி விலை, கேளிக்கை வசதிகள் உள்ளிட்டவை குறித்து பல்வேறு வயதுடைய சுற்றுலா பயணிகளிடம் கேள்விகள் கேட்கப்பட்டது.

இந்த ஆய்வில், பார்கள், மியூசியம், உள்ளிட்ட அனைத்து வசதிகளிலும் பெர்லின் நகரம் முதல் இடத்தை பிடித்தது. அதற்கு அடுத்தடுத்த இடங்களில் இங்கிலாந்தின் லண்டன், பிரான்சின் பாரீஸ், அமெரிக்காவின் நியூயார்க் மற்றும் ஜப்பானின் டோக்கியோ நகரங்கள் இடம் பெற்றன.

கேளிக்கைகளுக்கு ஏற்ற முதல் 25 நகரங்களின் பட்டியலில் டெல்லி 25 ஆவது இடத்தை பிடித்துள்ளது .இந்திய நகரங்களில் டெல்லி மட்டுமே இந்த பட்டியலில் இடம் பிடித்தது. பராம்பரிய நம்பிக்கைகளை கொண்டிராத நகரங்களில் தாய்லாந்தின் பாங்காக் முதலிடத்திலும், அதற்கு அடுத்ததாக டோக்கியோ நகரமும் இடம் பிடித்துள்ளன" என்று தெரிவிக்கப்பட்டுள்ளது.

ஏன் கோவா, பெங்களூரு, புதுச்சேரி போன்ற மது வாடை கமழும் நகரங்கள் இந்த வரிசையில் இடம் பெறவில்லை என்பது ஆச்சரியமாக இருக்கிறது.

English summary

New Delhi has been ranked 25th among the world's 'Most Fun' cities with Germany's capital Berlin topping the survey.