ஐபிஎல் 2023.. கேகேஆர் அணிக்கு சோதனை காலம் போல.. நிதீஷ் ராணாவுக்கும் காயம்!

கொல்கத்தா: கொல்கத்தா அணியின் நட்சத்திர வீரர் நிதீஷ் ராணா கணுக்காலில் ஏற்பட்ட காயம் காரணமாக பயிற்சியில் இருந்து வெளியேறியுள்ளார். அவரது காயத்திற்கு மருத்துவர்கள் தீவிர சிகிச்சையளித்து வருகின்றனர்.

ஐபிஎல் கிரிக்கெட் தொடர் இன்னும் சில நாட்களில் தொடங்கவுள்ள நிலையில், அனைத்து அணிகளும் தீவிரமாக பயிற்சி மேற்கொண்டு வருகின்றனர். நட்பபாண்டு ஐபிஎல் தொடருக்கு ரசிகர்கள் மட்டுமல்லாமல், வீரர்களும் ஆவலாக இருக்கின்றனர்.

ஆனால் கொல்கத்தா அணி பற்றி வெளியாகி வரும் செய்திகள் ரசிகர்களை கவலையடைய செய்துள்ளது. ஏற்கனவே கொல்கத்தா அணியின் கேப்டன் ஸ்ரேயாஸ் ஐயர் காயம் காரணமாக ஐபிஎல் தொடரில் பங்கேற்பது சந்தேகம் என்று தகவல் வெளியாகியுள்ளது.

ஸ்ரேயாஸ் பங்கேற்பதில் சிக்கல்

இதனால் அடுத்த கேப்டனாக யாரை நியமிக்கலாம் என்று கொல்கத்தா அணி நிர்வாகம் ஆலோசித்து வரும் நிலையில், அந்த அணியின் நட்சத்திர வீரர் ஃபெர்குசன் காயமடைந்தார். இலங்கை அணிக்கு எதிரான தொடரில் தசை பிடிப்பு காரணமாக ஃபெர்குசன் ஓய்வில் இருக்கிறார். இதனால் ஐபிஎல் தொடரின் முதல் சில போட்டிகளில் ஃபெர்குசன் பங்கேற்க மாட்டார் என்று தகவல் வெளியாகியுள்ளது.

அடுத்த கேப்டன் யார்?

இதனிடையே ஸ்ரேயாஸ் ஐயர் ஐபிஎல் தொடரில் பங்கேற்கவில்லை என்றால், நிதீஷ் ராணா அல்லது சுனில் நரைன் ஆகியோரில் ஒருவர் கேப்டனாக நியமிக்கப்பட வாய்ப்புகள் உள்ளதாக தகவல் வெளியானது. இந்திய வீரர் என்பதால் நிதீஷ் ராணா கேப்டனாக நியமிக்கப்படவே வாய்ப்புள்ளதாக பார்க்கப்பட்டது. இறுதி முடிவை கொல்கத்தா அணியின் பயிற்சியாளர் சந்திகாந்த் பண்டிட் இன்னும் சில நாட்களில் அறிவிக்க உள்ளார்.

நிதீஷ் ராணா காயம்

இந்த நிலையில் கொல்கத்தா மைதானத்தில் பயிற்சியில் ஈடுபட்டு வந்த கொல்கத்தா அணியின் நட்சத்திர பேட்ஸ்மேன் நிதீஷ் ராணாவுக்கு வலைபயிற்சியின் போது கணுக்காலில் காயம் ஏற்பட்டுள்ளது. இதனையடுத்து உடனடியாக பயிற்சியில் இருந்து வெளியேறிய நிதீஷ் ராணாவுக்கு சிகிச்சை அளிக்கப்பட்டு வருகிறது.

கேகேஆர் விளக்கம்

இதுகுறித்து கொல்கத்தா அணி நிர்வாகம் தரப்பில், நிதீஷ் ராணாவுக்கு ஏற்பட்டுள்ள காயம் விரைவில் சரியாகும். விரைவில் அவர் பயிற்சிக்கு திரும்புவார் என்று தெரிவிக்கப்பட்டுள்ளது. ஏற்கனவே கேப்டன் உட்பட இரு முக்கிய வீரர்கள் காயமடைந்துள்ள நிலையில், நிதீஷ் ராணாவும் காயமடைந்தது அந்த அணி ரசிகர்களிடையே சோகத்தை ஏற்படுத்தியுள்ளது.

English summary

Kolkata's star player Nitish Rana has been ruled out of training due to an ankle injury. Doctors are intensively treating his injuries.