அமைச்சரவையில் இடம் இல்லை.. அமித்ஷாவுக்கு பாஜக தலைவர் பதவியா?

டெல்லி: பிரதமர் அலுவலக இணை அமைச்சராவார் என்று யூகிக்கப்பட்ட பிரதமர் மோடியின் வலதுகரம் அமித்ஷா பெயர் அமைச்சரவை பட்டியலில் இடம்பெறவில்லை. இதனால் அவருக்கு பாரதிய ஜனதா தலைவர் பதவி கிடைக்க வாய்ப்பிருப்பதாக கூறப்படுகிறது.

குஜராத் மாநிலத்தில் நரேந்திர மோடியின் வலது கரமாக இருந்தவர் அமித்ஷா. பாரதிய ஜனதாவின் பிரதமர் வேட்பாளராக மோடி அறிவிக்கப்பட்டது முதலே உத்தரப்பிரதேச மாநில பொறுப்பாளராக நியமிக்கப்பட்டார்.

அம்மாநிலத்தில் பாரதிய ஜனதா வரலாற்று சாதனை படைக்கும் அளவுக்கு வெற்றி பெற்றதில் அமித்ஷாவின் பங்களிப்பு முதன்மையானது. இதனாலேயே அவருக்கு மோடி அமைச்சரவையில் இடம் கிடைக்கும் என்று கூறப்பட்டது.

குறிப்பாக குஜராத் முதல்வரான ஆனந்திபென் படேல் தேர்வு செய்யப்பட்ட நிலையில் அமித்ஷா மத்திய அமைச்சராவார் என்று மிகவும் எதிர்பார்க்கப்பட்டது.

ஆனால் நேற்று பதவியேற்ற மோடி அமைச்சரவையில் அமித்ஷா பெயர் இடம் பெறவில்லை. அதே நேரத்தில் பாஜகவின் புதிய தலைவராக அமித்ஷாவையே நியமிக்க அதிக வாய்ப்புகள் இருப்பதாகவும் கூறப்படுகிறது.

பாரதிய ஜனதாவைப் பொறுத்தவரையில் ஒருவருக்கு ஒரு பதவி என்பதுதான் கடைபிடிக்கப்பட்டு வருகிறது. தற்போது பாஜக தலைவராக இருக்கும் ராஜ்நாத்சிங் மத்திய அமைச்சராகிவிட்டதால் புதிய பாஜக தலைவர் நியமிக்கப்பட இருக்கிறார்.

பாஜக தலைவராக நட்டா நியமிக்கப்படலாம் என்று கூறப்பட்டாலும் அனேகம் அமித்ஷாதான் தலைவராக நியமிக்கப்படலாம் என்கின்றன டெல்லி பாஜக வட்டாரங்கள்.

English summary

BJP leader Amit Shah played an important role behind the success of Narendra Modi in Uttar Pradesh. Thus, all eyes were set on what ministry Shah will be given charge of. When Anandiben Patel was announced as the Chief Minister of Gujarat, there were speculations that Amit Shah will probably be assigned to Prime Minister Office but he was not included in the cabinet announced on Monday. Thus, questions are being raised about the future of Amit Shah. What will be his role in Narendra Modi's government?