பெட்ரோல், டீசல் விலை லிட்டருக்கு ரூ.2 குறைகிறதா?

டெல்லி: பெட்ரோல் மற்றும் டீசலின் விலை லிட்டருக்கு ரூ.2 குறைக்கப்படக்கூடும் என்று கூறப்படுகிறது.

சர்வதேச சந்தையில் கச்சா எண்ணெய்யின் விலை தொடர்ந்து சரிந்து கொண்டிருக்கிறது. தற்போது ஒரு பீப்பாய் கச்சா எண்ணெய் 83 டாலராக உள்ளது. சர்வதேச சந்தையில் கச்சா எண்ணெய்யின் விலை, அமெரிக்க டாலருக்கு நிகரான இந்திய ரூபாயின் மதிப்பை வைத்து தான் பெட்ரோல், டீசல் விலை நிர்ணயம் செய்யப்படுகிறது. பெட்ரோலை போன்றே டீசல் விலையையும் பொதுத்துறை எண்ணெய் நிறவனங்கள் நியமிக்கின்றன.

இந்நிலையில் சர்வதேச சந்தையில் கச்சா எண்ணெய்யின் விலை சரிந்துள்ளதால் பெட்ரோல் மற்றும் டீசலை விலையை லிட்டருக்கு ரூ.2 குறைக்கப்படக்கூடும் என்று கூறப்படுகிறது. எண்ணெய் நிறுவனங்கள் விலையை நிர்ணயிக்க நடத்தும் கூட்டத்தில் இந்த முடிவு எடுக்கப்படுகிறதாம். விலை குறைப்பு வரும் 30ம் தேதி அமலுக்கு வரலாம் என்று கூறப்படுகிறது.

முன்னதாக இந்த மாத துவக்கத்தில் பெட்ரோல் மற்றும் டீசல் விலை குறைக்கப்படும் என்று தெரிவிக்கப்பட்டது. இந்நிலையில் மத்திய அரசு பெட்ரோல், டீசல் மீதான கலால் வரியை கடந்த 13ம் தேதி அதிரடியாக உயர்த்தியது. இதனால் பெட்ரோல், டீசல் விலை குறைக்கப்படவில்லை. அதே சமயம் விலை உயர்த்தப்படவும் இல்லை.

கடைசியாக கடந்த மாதம் 31ம் தேதி பெட்ரோல் விலை லிட்டருக்கு ரூ.2.41ம், டீசல் விலை ரூ.2.25ம் குறைக்கப்பட்டது என்பது குறிப்பிடத்தக்கது.

English summary

Buzz is that petrol and diesel prices will be slashed by Rs. 2 per litre by the end of this month.