மோடிக்கு ‘லுக்கிங் பிஸி, டூயிங் நத்திங்’ நோய்.. காங்கிரஸ் "கண்டுபிடிப்பு"!

டெல்லி: பிரதமர் மோடி ‘லுக்கிங் பிஸி, டுயிங் நத்திங்' நோயினால் அவதிப்படுகிறார் என காங்கிரஸ் தலைவர் மணிஷ் திவாரி தெரிவித்துள்ளார்.

மூன்று நாடுகள் பயணமாக சீனா, மங்கோலியாவிற்குச் சென்ற பிரதமர் மோடி, தற்போது தென்கொரியா சென்றுள்ளார். தனது சீனபயணத்தின் போது, சீனவாழ் இந்திய மக்கள் மத்தியில் பேசிய மோடி, தனது வெளிநாட்டுப் பயணங்கள் குறித்து காங்கிரஸ் கட்சியின் விமர்சனத்துக்கு சூசகமாக பதிலளித்தார்.

அப்போது அவர், ‘‘மோடி எதற்காக இத்தனை நாடுகளுக்கு பயணம் செய்கிறார் என்று சிலர் கேட்கிறார்கள். நீங்கள் கொஞ்சமாக வேலை செய்தால், விமர்சனம் வருவது இயல்பு. நீங்கள் தூங்கிக்கொண்டிருந்தாலும், விமர்சனம் வருவது இயற்கை. ஆனால் அதிகமாக வேலை செய்வதற்காக என்னை விமர்சனங்களால் தாக்குவது எனது துரதிர்ஷ்டம்'' என்றார்.

மேலும், ‘‘அதிகமாக உழைப்பதுதான் குற்றம் என்றால், நான் அந்த குற்றத்தை செய்து கொண்டே இருப்பேன். நான் மக்களுக்கு அளித்த வாக்குறுதி அதுதான்'' என மோடி உரையாற்றினார்.

இந்நிலையில், மோடியின் இந்த பதில் குறித்து காங்கிரஸ் தலைவர் மணிஷ் திவாரி விமர்சித்துள்ளார். அதில் அவர், "தாங்கள் மிகவும் பிஸியாக வேலைசெய்கிறோம் என்று காட்டிக் கொள்பவர்கள், எந்தஒரு பணியும் செய்யவில்லை என்பதே உண்மையானது. இந்த நோய் ‘லுக்கிங் பிஸி, டுயிங் நத்திங்' (வேலை செய்வது போன்று தெரிவது, ஆனால் ஒன்றும் நடக்காது) என்று ஆங்கிலத்தில் அழைக்கப்படுகிறது. பிரதமர் மோடி இந்த நோயினால் அவதிப்படுகிறார்' என்றார்.

English summary

Congress leader Manish Tewari on Sunday took a jibe at Narendra Modi over his claim that he was working tirelessly saying he was suffering from a disease called "LBDN -- Looking Busy Doing Nothing".