குஜராத்தில் அழுத்தமாக கால் பதித்த ராகுல்.. பாஜகவை பயமுறுத்தியது எப்படி?

குஜராத் தேர்தலில் தோற்று இருந்தாலும் இதில் காங்கிரஸ் கட்சியினர் மகிழ்ச்சியடைய நிறைய விஷயங்கள் நடந்து இருக்கிறது.

அஹமதாபாத்: குஜராத் தேர்தலில் தோற்று இருந்தாலும் இதில் காங்கிரஸ் கட்சியினர் மகிழ்ச்சியடைய நிறைய விஷயங்கள் நடந்து இருக்கிறது. மேலும் ராகுலின் சிறப்பான செயல்பாடு பாஜக கட்சிக்கு கொஞ்சம் கலக்கத்தை உண்டாக்கி இருக்கிறது.

பாஜக வெல்லும் என உறுதியாக நினைத்த சில தொகுதிகளில் காங்கிரஸ் வென்று இருக்கிறது. மேலும் ராகுல் குஜராத்தில் இருக்கும் சில முக்கிய தலைவர்களை தங்கள் பக்கம் இழுத்து இருக்கிறார்.

இந்த தேர்தலில் இல்லையென்றாலும் எதிர்காலத்தில் இது காங்கிரஸ் கட்சிக்கு பெரிய பலத்தை உண்டாகும். அதேபோல் ராகுல் காந்தியின் தலைமைப்பண்பும் இதன் மூலம் வெளியே வந்து இருக்கிறது.

ராகுல் பக்கம் இருக்கும் மும்மூர்த்திகள்

குஜராத் தேர்தல் தொடங்கியவுடன் முதல் வேலையாக அங்கு இருக்கும் இளம் தலைவர்களை ராகுல் தங்கள் வசம் இழுத்தார். பட்டேல் சமூகத்திற்காக பெரிய போராட்டம் செய்த ஹர்திக் பட்டேலை முதலில் கட்சிக்கு ஆதரவு தெரிவிக்க கோரினார். ஆனால் அவர் வெளிப்படையாக எதுவும் தெரிவிக்கவில்லை என்றாலும் பாஜக கட்சிக்கு எதிராக பேசினார். அதேபோல் தலித் தலைவர் ஜிக்னேஷ் மேவானி காங்கிரஸுக்கு ஆதரவானார். ஏற்கனவே காங்கிரஸ் கட்சியில் பிற்படுத்தப்பட்ட மக்களின் தலைவர் அல்பேஷ் தாக்குர் இருக்கிறார். இவர்கள் காங்கிரஸ் கட்சிக்கு பெரும் நம்பிக்கையாக இருந்தனர்.

மிதமான ஹிந்துத்துவா

ராகுல் இந்த தேர்தலுக்காக ஹிந்துத்துவ அரசியலை பயன்படுத்தக்கூட தயங்கவில்லை. குஜராத்தில் இருக்கும் நிறைய கோவில்களுக்கு சென்று வழிபாடு நடத்தினார். கழுத்தில் புதிதாக வெளியே தெரியும்படி புதிய மாலை அணிந்து இருந்தார். பேச்சுக்கு இடையில் அடிக்கடி இந்துத்துவ கருத்துக்களை வெளிப்படுத்தினார். அதே சமயத்தில் அது அதிகமாகிவிடாதபடி பார்த்துக் கொண்டார்.

இதுதான் குஜராத் மாடலா

ஹிந்துத்துவா குறித்து பேசிய ராகுல் வளர்ச்சி குறித்தும் பேச தவறவில்லை. குஜராத் மாடல் என்று கூறியது என்ன ஆனது என்று கேள்வி எழுப்பினார். பிற்படுத்தப்பட்ட மக்களின் வேலைவாய்ப்பு குறைந்தது ஏன் என்று நிறைய கேள்விகள் கேட்டார். மேலும் 5 முறை தொடர்ச்சியாக வெற்றிபெற்ற பாஜக குஜராத்தை அழித்துவிட்டதாகவும் கோபமாக கூறினார். இது பிரச்சாரத்தில் அதிக பலன் அளித்தது.

எல்லாமே இனிதான்

தற்போது ராகுல், காங்கிரஸ் தலைவர் ஆகி உள்ளார். இந்த தேர்தல் கண்டிப்பாக அவருக்கு நல்ல அரசியல் அறிவை வழங்கி இருக்கும். மிக முக்கியமாக பாஜகவின் இரும்பு கோட்டையாக இருந்த குஜராத் இப்போதுதான் கொஞ்சம் ஆட்டம் கண்டு இருக்கிறது. மற்ற மாநிலங்களில் எளிதாக வென்ற பாஜக இதில் வெற்றிபெற படாதபாடு பட்டு இருக்கிறது. ராகுலின் அரசியல் பாஜகவின் அந்த சிரமத்தில் இருந்துதான் ஆரம்பிக்கிறது.

English summary

Rahul Gandhi made a great mark on BJP in Gujarat. As the new gen congress leader he made a great break through in Gujarat election even though they last in it.