காங். பிரதமர் வேட்பாளராக ராகுல் காந்தி- அடுத்த மாதம் அறிவிப்பு?

டெல்லி: காங்கிரஸ் கட்சியின் பிரதமர் வேட்பாளராக ராகுல் காந்தியை அக்கட்சியின் காரிய கமிட்டி அடுத்த மாதம் அறிவிக்க இருக்கிறது.

லோக்சபா தேர்தல் தேதி அறிவிப்புக்கு முன்னரே பாரதிய ஜனதாவின் பிரதமர் வேட்பாளராக நரேந்திர மோடி அறிவிக்கப்பட்டார். லோக்சபா தேர்தலுக்கு ஒத்திகையாக 5 மாநில சட்டசபை தேர்தலிலும் நரேந்திர மோடியை முன்னிறுத்தியே பாஜக பிரசாரம் மேற்கொண்டது.

இதன் மூலம் பாஜகவின் செல்வாக்கும் உயர்ந்ததாக நம்பப்படுகிறது. அதே நேரத்தில் காங்கிரஸ் கட்சியில் பிரதமர் வேட்பாளர் யாரென்று அறிவிக்கப்படாத காரணத்தினாலேயே அக்கட்சி செல்வாக்கை பறிகொடுத்தது என்ற கருத்தும் நிலவுகிறது.

இந்நிலையில் லோக்சபா தேர்தல் மார்ச் அல்லது ஏப்ரல் மாதம் நடைபெறக் கூடும் என்று தெரிகிறது. இதனால் அடுத்த மாதம் நடைபெற உள்ள காங்கிரஸ் கட்சியின் காரியக் கமிட்டி கூட்டத்தில் அக் கட்சி தமது பிரதமர் வேட்பாளரை அறிவிக்க வேண்டிய நிலைக்குத் தள்ளப்பட்டுள்ளது.

தற்போதைய நிலையில் காங்கிரஸ் துணைத் தலைவர் ராகுல் காந்தியையே பிரதமர் வேட்பாளராக அறிவிப்பது என காங்கிரஸ் காரியக் கமிட்டி திட்டமிட்டிருப்பதாக டெல்லி செய்திகள் தெரிவிக்கின்றன.

English summary

Rahul Gandhi's name as Congress PM candidate could be announced in AICC meeting which is to be held in Delhi on January