பிரதமர் மோடியையும் விட்டு வைக்காத ராம்கோபால் வர்மா.. பதறும் பாலிவுட்!
இயக்குநர் ராம்கோபால் வர்மா தனது அடுத்த வம்பை ஆரம்பித்துவிட்டார். இந்த முறை அவர் வம்பிழுத்திருப்பது பிரதமர் நரேந்திர மோடியை.
‘ஸ்வச் பாரத்' என்ற தூய்மை இந்தியா திட்டத்தின் அனிமேஷன் விளம்பரம் சமீபத்தில் வெளியானது.
இந்த விளம்பரத்தைப் பார்த்த ராம்கோபால் வர்மா, "இந்த விளம்பரம் எனது ‘ஆக்' திரைப்படத்தைவிட படுமோசமாக உள்ளது. இதுபோன்ற விளம்பரங்களால் இந்தியா தூய்மையற்றுத்தான் போகும் என்று யாராவது மோடியிடம் கூறுங்கள்" என்று ட்வீட் போட்டு சர்ச்சையைக் கிளப்பியுள்ளார்.
ஆக் படம் 2007ம் ஆண்டு வெளியானது. அமிதாப் நடித்திருந்த இந்தப் படம் ஷோலேயின் தழுவல். மிகக் கேவலமான தோல்வியைத் தழுவி, பாலிவுட்டின் மோசமான படங்களில் முதலிடம் பிடித்தது.
இந்த திரைப்படத்தைவிட மோடியின் மேற்பார்வையில் உருவாகி வெளியான தூய்மை இந்தியா விளம்பரம் மோசம் என்று கூறியுள்ளார் வர்மா.
இதுபோல் டிவிட்டுவது அவருக்கொன்றும் புதியதில்லை என்றாலும் நேரடியாக பிரதமர் மோடியைக் குறைசொல்லியிருப்பது பெரும் பிரச்சனைக்குள்ளாகியுள்ளது. இதனால் ஏதும் பிரச்சினை வருமோ என அவருக்கு நெருக்கமான பாலிவுட் பிரபலங்கள் பதறி வருகின்றனர்.