வெட்கக்கேடு: ஆண், பெண் சமத்துவத்தில் இந்தியாவை தோற்கடித்த பாகிஸ்தான், வங்கதேசம்

சென்னை: அண்டை நாடுகளான பாகிஸ்தான், வங்கதேசத்தை விட இந்தியாவில் ஆண், பெண் சமத்துவம் மோசமாக இருப்பது ஐ.நா. அறிக்கை மூலம் தெரிய வந்துள்ளது.

ஐக்கிய நாடுகள் வளர்ச்சித் திட்டத்தின் கீழ் மனித மேம்பாட்டு அறிக்கை வெளியிடப்பட்டுள்ளது. அதில் பல்வேறு பிரிவுகளின் கீழ் பல நாடுகளின் தரவரிசைப் பட்டியல் உள்ளது. அதில் ஒரு முக்கியமான பிரிவு ஆண், பெண் சமத்துவம்.

ஆண், பெண் சமத்துவம் உள்ள நாடுகள் பட்டியலில் 155 நாடுகளின் பெயர்கள் உள்ளன.

இந்தியா

ஆண், பெண் சமத்துவம் உள்ள நாடுகள் பட்டியலில் இந்தியாவுக்கு 130வது இடம் தான் கிடைத்துள்ளது. அதே பட்டியலில் பாகிஸ்தானுக்கு 121வது இடமும், வங்கதேசத்திற்கு 111வது இடமும் கிடைத்துள்ளது.

மோசம்

தெற்காசிய நாடுகளை பொறுத்த வரை ஆப்கானிஸ்தானை விட இந்தியாவில் ஆண், பெண் சமத்துவம் நன்றாக உள்ளது. அவ்வளவு தான்.

நாடாளுமன்றம்

இந்திய நாடாளுமன்றத்தில் 12 சதவீத பெண்கள் உள்ளனர். ஆனால் பாகிஸ்தான் நாடாளுமன்றத்திலோ 19.7 சதவீத பதவிகளில் பெண்கள் உள்ளனர். ஆப்கானிஸ்தான் மற்றும் வங்கதேச நாடாளுமன்றங்களில் 27.6 சதவீத பெண்களும், 20 சதவீத பெண்களும் உள்ளனர்.

மகப்பேறு இறப்பு விகிதம்

பாகிஸ்தான் மற்றும் வங்கதேசத்தில் மகப்பேறு இறப்பு விகிதம் 170 ஆக உள்ளது. ஆனால் இந்தியாவில் அது 190 ஆக உள்ளது. அதாவது இந்தியாவில் 1 லட்சம் பிரசவத்தில் 190 பிரசவத்தில் பெண்கள் பலியாகின்றனர்.

இந்திய பெண்கள்

இந்தியாவில் கல்வி, வேலை என்று பல விஷயங்களில் ஆண்களை விட பெண்கள் பின்தங்கியுள்ளனர். ஆண்களை விட பெண்கள் அதிக ஆண்டுகள் வாழ்வது மட்டும் தான் ஆறுதலான விஷயம்.

English summary

Compared to our neighbours Pakistan and Bangladesh, gender inequality is high in India. This fact is revealed by none other than UN.