பாஜக தலைவராக அமித்ஷா.... ஆர்.எஸ்.எஸ். ஒப்புதல்! விரைவில் அதிகாரப்பூர்வ அறிவிப்பு!!
டெல்லி: பாரதிய ஜனதா கட்சியின் தேசியத் தலைவராக பிரதமர் நரேந்திர மோடியின் வலது கரமான அமித்ஷாவை நியமிக்க அதன் தாய் அமைப்பான ஆர்.எஸ்.எஸ்.இயக்கம் ஒப்புதல் தெரிவித்துள்ளதாக தகவல்கள் வெளியாகியுள்ளன. இதனைத் தொடர்ந்து பாஜகவின் தலைவராக அமித்ஷாவை நியமிக்கும் அதிகாரப்பூர்வ அறிவிப்பு எந்த நேரத்திலும் வெளியாகலாம் என தகவல்கள் தெரிவிக்கின்றன.
பாரதிய ஜனதா கட்சியின் தலைவரான ராஜ்நாத்சிங் உள்துறை அமைச்சரானதைத் தொடர்ந்து அக்கட்சியின் புதிய தலைவர் யார் என்பது குறித்து விவாதிக்கப்பட்டு வந்தது. இது குறித்து பாஜகவின் தாய் அமைப்பான ஆர்.எஸ்.எஸ். தலைவர்களிடமும் ஆலோசிக்கப்பட்டது.
நட்டா, மதூர்
பாரதிய ஜனதாவின் புதிய தலைவர் பட்டியலில் ஜே.பி.நட்டா, ஓம் மதூர் ஆகியோர் பெயர் அடிபட்டது. ஆனாலும் அமித்ஷாவுக்கே அதிக ஆதரவு இருப்பதாக கூறப்படுகிறது.
மோடியின் வலது கரம்
குஜராத் முதல்வராக மோடி பதவி வகித்த போது அமித்ஷாவுக்கு உள்துறை உள்பட 10 துறைகள் ஒதுக்கப்பட்டன. இதனால் நரேந்திர மோடியின் வலதுகரமாக அமித்ஷா உருவானார். சொராபுதீன் ஷேக், துளசிராம் பிரஜாபதி என்கவுன்ட்டர் வழக்குகள், இளம்பெண் வேவு விவகாரம் என பல சர்ச்சைகளில் அமித்ஷா சிக்கியுள்ளார்.
உ.பி.யில் அறுவடை
அமித் ஷா தற்போது உத்தரப்பிரதேச மாநில பாரதிய ஜனதா பொறுப்பாளராக இருக்கிறார். லோக்சபா தேர்தலில் உத்தரப் பிரதேசத்தில் 71 இடங்களை பாரதிய ஜனதா கைப்பற்றியதற்கு அமித்ஷாவின் வியூகமும் முக்கிய காரணம்.
ஆர்.எஸ்.எஸ்.
இதனாலேயே அமித்ஷாவையே பாஜகவின் தலைவராக நியமிக்கலாம் என்று ஆர்.எஸ்.எஸ். அமைப்பும் ஒப்புதல் தெரிவித்துள்ளது.
எந்த நேரத்திலும் அறிவிப்பு
இதைத் தொடர்ந்து அமித்ஷாவை பாஜக தலைவராக நியமித்து எந்த நேரத்திலும் அறிவிப்பு வெளியாகலாம் என்று கூறப்படுகிறது.
Click it and Unblock the Notifications
Sign in with Google