சத்யஜித்ரேயின் மனைவி பிஜோயா ரே காலமானார்- மம்தா நேரில் அஞ்சலி

கோல்கட்டா: உலகப்புகழ் பெற்ற திரைப்பட இயக்குநர் சத்யஜித்ரேயின் மனைவி பிஜோயா ரே காலமானார். அன்னாருக்கு வயது 98.

மேற்கு வங்க மாநிலத்தைச் சேர்ந்த திரைப்பட இயக்குநர் சத்யஜித்ரே. இவரது திரைப்படங்கள் காலத்தால் அழியாத புகழ் பெற்றவை. ஆஸ்கார், பாரதரத்னா உள்ளிட்ட உயரிய விருதுகளைப் பெற்ற சத்யஜித்ரேயின் மனைவி பிஜோயா ரே.

1917-ம் ஆண்டு பிறந்த பிஜோயா, 1948-ம் ஆண்டு அக்டோபர் மாதம் 20-ம் தேதி சத்யஜித்ரேயை திருமணம் செய்து கொண்டார். இந்தத் தம்பதிக்கு சந்தீப் ரே என்ற மகன் உள்ளார். இவரும் மேற்கு வங்க மாநிலத்தில் புகழ் பெற்ற இயக்குநர் ஆவார்.

கடந்த 1992ம் ஆண்டு சத்யஜித்ரே காலமானார். அதனைத் தொடர்ந்து மகனுடன் வசித்து வந்தார் பிஜோயா. இவர் முதுமை காரணமாக நுரையீரல் நோயால் அவதிப்பட்டு வந்தார்.

இந்நிலையில் சிகிச்சைக்காக மருத்துவமனையில் அனுமதிக்கப் பட்டிருந்த பிஜோயா, சிகிச்சைப் பலனின்றி இன்று காலமானார். மறைந்த பிஜோயா சில படங்களில் நடித்துள்ளார் என்பது குறிப்பிடத்தக்கது.

பிஜோயாவின் மரணச் செய்தி கேள்விப்பட்ட அம்மாநில முதல்வர் மம்தா பானர்ஜி, மருத்துவமனைக்கு சென்று நேரில் அஞ்சலி செலுத்தினார்.

English summary

Legendary filmmaker Satyajit Ray's widow Bijoya Ray died in Kolkata on Tuesday after a prolonged illness.