மோடி சர்க்காரில் 7 பெண் அமைச்சர்கள்

டெல்லி: பிரதமர் நரேந்திர மோடி அமைச்சரவையில் 7 பெண் அமைச்சர்கள் இடம்பெற்றுள்ளனர். இவர்களில் சுஷ்மா ஸ்வராஜ் பாதுகாப்புக்கான மத்திய அமைச்சரவைக் குழுவில் இடம்பெறக் கூடும்.

பிரதமர் நரேந்திர மோடி மற்றும் 45 மத்திய அமைச்சர்கள் நேற்று பதவியேற்றுக் கொண்டனர். இவர்களில் 23 பேர் கேபினட் அமைச்சர்கள். 10 பேர் தனிப்பொறுப்புடன் கூடிய இணை அமைச்சர்கள். 12 பேர் இணை அமைச்சர்கள். இந்த 45 பேரில் 7 பேர் பெண்கள்.

சுஷ்மா ஸ்வராஜ்

மோடி அமைச்சரவையில் சீனியர் பெண் அமைச்சர் சுஷ்மாதான். வெளியுறவுத் துறை அமைச்சர் பதவி கிடைக்கும் என்று கூறப்படுகிறது. முக்கியத்துவம் வாய்ந்த பாதுகாப்புக்கான மத்திய அமைச்சரவைக் குழுவில் சுஷ்மா இடம்பெறலாம்.

நஜ்மா ஹெப்துல்லா

1980ஆம் ஆண்டு முதல் ராஜ்யசபா எம்.பியாக இருந்து வரும் 74 வயது நஜ்மா ஹெப்துல்லா இவர்களில் மிகவும் மூத்தவர்.

ஸ்மிரிதி இரானி

38 வயதான ஸ்மிரிதி இரானிதான் மோடி அமைச்சரவையில் இளம் வயதுடையவர்.

உமாபாரதி, மேனகா, ஹர்சிம்ரத் கவுர்

மத்திய பிரதேச மாநிலத்தின் முன்னாள் முதல்வரான உமாபாரதி, முன்னாள் மத்திய அமைச்சரான இந்திரா குடும்பத்தை சேர்ந்த மேனகா காந்தி, பஞ்சாப் முதல்வர் பாதலின் மருமகன் ஹர்சிம்ரத் கவுர் ஆகியோர் இதர கேபினட் அமைச்சர்களாவர்.

ஹர்சிம்ரத் கவுர்

பாஜக கூட்டணிக் கட்சிகளின் சார்பில் கேபினட்டில் இடம்பிடித்த ஒரே பெண் சிரோமணி அகாலிதளத்தைச் சேர்ந்த ஹர்சிம்ரத் கவுர்.

நிர்மலா சீதாராமன்

6 பெண் கேபினட் அமைச்சர்கள் மட்டுமில்லாது பாஜக செய்தித் தொடர்பாளர் நிர்மலா சீதாராமன் தனிப்பொறுப்புடன் கூடிய இணை அமைச்சராக பொறுப்பேற்றுள்ளார். இவர் தற்போது எம்.பியாக இல்லை. 6 மாதங்களுக்குள் ராஜ்யசபா அல்லது லோக்சபா எம்.பியாக இவர் தேர்ந்தெடுக்கப்பட வேண்டும்.

மன்மோகன் அரசில்..

கடந்த மன்மோகன்சிங் அரசில் கிரிஜா வியாஸ், சந்திரேஸ் கடோச் ஆகிய இரு பெண் அமைச்சர்கள்தான் இருந்தனர்.

அதிகமாகும் வாய்ப்பு

நாட்டிலேயே முதல் முறையாக 61 பெண் எம்.பிக்கள் இப்போதுதான் தேர்வாகி இருக்கின்றனர். ராஜ்யசபாவில் 29 பெண் எம்பிக்கள் உள்ளனர். இதனால் மோடி அமைச்சரவையில் பெண் அமைச்சர்கள் எண்ணிக்கை அதிகரிக்க வாய்ப்புள்ளது.

English summary

Seven women took oath as ministers in the Narendra Modi government on monday, and one of them is set to be a member of the all powerful Cabinet Committee on Security (CCS).