மருத்துவ பரிசோதனைக்காக அமெரிக்காவுக்கு கிளம்பிய சோனியா: கட்சி ராகுல் பொறுப்பில்

டெல்லி: காங்கிரஸ் தலைவர் சோனியா காந்தி மருத்துவ பரிசோதனைக்காக அமெரிக்கா சென்றுள்ளார்.

காங்கிரஸ் தலைவர் சோனியா காந்திக்கு கடந்த 2011ம் ஆண்டு உடல்நலக் குறைவு ஏற்பட்டது. இதையடுத்து அமெரிக்காவுக்கு சென்ற அவருக்கு அங்கு அறுவை சிகிச்சை செய்யப்பட்டது. அதன் பிறகு நாடு திரும்பிய அவர் அதிகமாக சுற்றுப்பயணம் செய்வதை குறைத்துக் கொண்டார்.

இந்நிலையில் அவர் மருத்துவ பரிசோதனைக்காக சனிக்கிழமை டெல்லியில் இருந்து அமெரிக்கா கிளம்பிச் சென்றார். அவர் திரும்பி வரும் வரை கட்சி பணிகளை அவரது மகனும், கட்சியின் துணை தலைவருமான ராகுல் காந்தி கவனித்துக் கொள்கிறார்.

சோனியா வரும் 17ம் தேதிக்குள் நாடு திரும்புவார் என்று கூறப்படுகிறது. சோனியா நியூயார்க் நகரில் டாக்டர்களை சந்திக்கிறார். சோனியாவுக்கு மூச்சுத்திணறல் பிரச்சனை உள்ளது. அதற்காக அவர் சிகிச்சை பெற்று வருகிறார்.

முன்னதாக அவர் ஆஸ்துமாவால் அவதிப்பட்டு வந்தார் என்பது குறிப்பிடத்தக்கது.

English summary

Congress president Sonia Gandhi has left for US for medical check-up.