"இலங்கை மக்கள் சொல்லமுடியாத துயரத்தை அனுபவித்து வருகின்றனர்": போராட்டத்தில் குதித்த இளைஞர்கள்

By BBC News தமிழ்

Updated: Friday, March 18, 2022, 20:25 [IST]

Subscribe to Oneindia Tamil

BBC

போராடும் இளைஞர்கள்

இலங்கையில் ஏற்பட்டுள்ள நெருக்கடிகளை அடுத்து, அரசாங்கத்திற்கு எதிராக இளைஞர்கள் படையொன்று இன்று கொழும்பிலுள்ள ஜனாதிபதி செயலகத்தை முற்றுகையிட் டது.

இலங்கையில் கடும் பொருளாதார நெருக்கடி ஏற்பட்டுள்ளது. அத்தியாவசிய பொருட்களின் விலை பல மடங்காக உயர்ந்துள்ளது. மக்கள் மண்ணெண்ணெய் வாங்கவும், பெட்ரோல் நிரப்பவும் நீண்ட வரிசையில் காத்து கிடக்கின்றனர்.

இந்நிலையில் இலங்கையில் நிலவும் சூழலை கண்டித்து சோஷியலிச இளைஞர்கள் சங்கத்தை சேர்ந்த ஆயிரக்கணக்கான இளைஞர்கள், பேரணியாக ஜனாதிபதி செயலகம் வரை பயணித்திருந்தனர்.

இதையடுத்து, கொழும்பு - புறக்கோட்டை மற்றும் அதனை அண்மித்த பகுதிகளில் கடும் வாகன நெரிசல் ஏற்பட்டது.

இந்த நிலையில், ஜனாதிபதி செயலகத்தை நோக்கி சென்ற ஆர்ப்பாட்ட பேரணியில் ஈடுபட்ட இளைஞர்கள், ஜனாதிபதி செயலக முன்றலில் அமர்ந்தவாறு முதலில் தங்களது போராட்டத்தை ஆரம்பித்திருந்தனர்.

இலங்கையின் சொத்துக்களை வெளிநாடுகளுக்கு விற்பனை செய்தல், பொருளாதார நெருக்கடிக்கு மத்தியில் ஏற்பட்டுள்ள வாழ்க்கை செலவு அதிகரிப்பு, பொருட்களுக்கான தட்டுப்பாடு உள்ளிட்ட நாடு எதிர்நோக்கியுள்ள அனைத்து பிரச்னைகளையும் முன்னிலைப்படுத்தி இந்த போராட்டம் முன்னெடுக்கப்பட்டது.

BBC

போராடும் இளைஞர்கள்

இதன்போது, ஜனாதிபதி செயலகத்தை அண்மித்த பகுதியில் கடும் பாதுகாப்பு நடவடிக்கைகள் பலப்படுத்தப்பட்டிருந்ததை அவதானிக்க முடிந்தது.

ஜனாதிபதி கோட்டாபய ராஜபக்ச தலைமையிலான அரசாங்கத்திற்கு எதிராக கோஷங்கள் எழுப்பப்பட்டன.

சோஷியலிச இளைஞர்கள் சங்கத்தின் தேசிய குழு உறுப்பினரான அருண் ஹேமசந்திரன், பிபிசி தமிழுக்கு கருத்து தெரிவித்தார்.

''இலங்கை மக்கள் இன்று சொல்லெண்ணா துயரங்களை அனுபவித்து வருகின்றனர். எரிபொருள் வாங்க வரிசையில் நிற்க வேண்டியுள்ளது. தொடர் மின்வெட்டுக்கள் ஏற்பட்டு வருகின்றன. அத்தியாவசிய பொருட்களுக்கு பாரிய தட்டுப்பாடு இந்த நாட்டில் காணப்படுகின்றது. விலைவாசி கடுமையாக உயர்ந்துள்ளது. இவ்வாறான நிலையில், ஆட்சியாளர்கள் பொறுப்பாக செயற்படுவதற்கு பதிலாக இந்த ஆட்சியாளர்கள் தொடர்ந்து, அசமந்தமாக செயற்பட்டு கொண்டு வருகின்றார்கள்" என தெரிவித்தார்.

பெட்ரோல், மண்ணெண்ணெய்க்கு காத்திருக்கும் குடும்பங்கள் – இலங்கை கள நிலவரம்

இலங்கை பொருளாதார நெருக்கடி: 7500 கோடி ரூபாய் மதிப்பிலான கடனுதவி வழங்கும் இந்தியா

மேலும், நாட்டின் தேசிய வளங்களை அரசாங்கம் விற்பனை செய்து வருவதாகவும் அவர் குறிப்பிடுகின்றார்.

''இந்த நாட்டின் தேசிய வளங்கள் விற்கப்பட்டு வருகின்றன. நாட்டின் வளங்களை விற்க போவதில்லை என இவர்கள் கூறியிருந்தார்கள். அதேபோன்று, விற்ற வளங்களை மீண்டும் பெறுவோம் என கூறியிருந்தார்கள். ஆனால், எது எவ்வாறாயினும், இன்றைய நிலையில், அன்றாடம் எமது வளங்கள் விற்கப்பட்டு வருகின்றன. இங்கு பார்த்தால், போர்ட் சிட்டி விற்கப்பட்டு விட்டது. அதேபோன்று, திருகோணமலையின் மிகவும் விலை மதிப்புள்ள எண்ணெய் தாங்கிகள் இப்போது விற்கப்பட்டுக் கொண்டிருக்கின்றது,"

"சம்பூர், மன்னார் மாவட்டம், கிளிநொச்சி மாவட்டம் உள்ளிட்ட பல்வேறுப்பட்ட பிரதேசங்களும், மக்களின் காணிகளும் விற்பனை செய்வதற்கான நடவடிக்கைகள் முன்னெடுக்கப்பட்டு வருகின்றன. கெரவலபிட்டிய பிரதேசத்திலிருக்கின்ற மிகவும் விலை மதிப்பான மின்சக்தி நிலையத்தை கூட நள்ளிரவில் ஒப்பந்தம் கைச்சாத்திடப்பட்டு அமெரிக்க நிறுவனமொன்றிற்கு விற்றிருக்கின்றார்கள். இந்த அட்சியை எதிர்த்து இன, மத, மொழி பேதமின்றி, தமிழ், சிங்களம், முஸ்லிம் என்ற பேதமின்றி இன்று போராடி வருகின்றோம்" என சோசலிஷ இளைஞர்கள் சங்கத்தின் தேசிய குழு உறுப்பினரான அருண் ஹேமசந்திரன் தெரிவித்தார்.

BBC

போராடும் இளைஞர்கள்

இதேவேளை, ஆர்ப்பாட்டத்தில் ஈடுபட்டவர்கள் ஜனாதிபதி செயலகத்திற்கு முன்பாக மின்பிறப்பாக்கி (generator) ஒன்றை இயக்கிய நிலையில், அங்கு அமைதியின்மை ஏற்பட்டது. மின்சாரம் இல்லாத நிலையில் ஜெனரேட்டர்களை பயன்படுத்தும் நிலையே ஏற்படுகிறது என்பதை விளக்க இவ்வாறு செய்தனர்.

ஆனால் பாதுகாப்பு காரணங்களை முன்னிலைப்படுத்தி, இயக்கப்பட்ட மின்பிறப்பாக்கியை செயலிழக்க செய்யுமாறு பாதுகாப்பு பிரிவினர், வலியுறுத்தியதை அடுத்து, அங்கு அமைதியின்மை நிலவியதுடன், பின்னர் மின்பிறப்பாக்கியை பாதுகாப்பு பிரிவினர் செயலிழக்கச் செய்தனர்.

சற்று நேரம் நிலவிய அமைதியின்மை பின்னர், வழமைக்கு கொண்டு வரப்பட்டது.

அதனைத் தொடர்ந்து, பல மணிநேரம் பாரிய போராட்டத்தில் ஈடுபட்ட இளைஞர்கள், அமைதியாக கலைந்து சென்றனர்.

அரசாங்கத்தின் நடவடிக்கைகளுக்கு எதிரான போராட்டம் தொடரும் என அறிவிப்பை வெளியிட்டவாறே, இளைஞர் யுவதிகள் அங்கிருந்து வெளியேறியிருந்தனர்.

பிற செய்திகள்: