தெலுங்கு தேச கட்சியில் மதிப்பில்லை… பாஜகவிற்கு போகும் நடிகர் சுமன்

ஹைதராபாத்: தெலுங்கு தேசம் கட்சியில் யாரும் தன்னை மதிக்கவில்லை என்பதால் பாஜகவிற்கு தாவ தயாராகிறார் வில்லன் நடிகர் சுமன். பாஜகவில் இருந்து அழைப்பு வந்தால் இணையதயாராக உள்ளதாக கூறியுள்ளார்.

தெலுங்கு திரையுலகில் பரபரப்பாக இருக்கும் நடிகர் சுமன் தெலுங்கு தேசம் கட்சியில் தற்போதுஉறுப்பினராக உள்ளார்.

திருப்பதியில் நேற்று சுமன் சுப்ரபாத சேவையின்போது ஏழுமலையானை தரிசனம் செய்தார். பின்னர் செய்தியாளர்களிடம் பேசிய அவர், கூறியதாவது:

தெலுங்கு தேசம் கட்சியில் நீண்ட காலமாக இருந்து வருகிறேன். ஆனால் கட்சியில் எனக்கு மரியாதை இல்லை. என்னை அவர்கள் கண்டுகொள்ளவில்லை.

சந்திரபாபு நாயுடு 10 ஆண்டு காலம் ஆட்சியில் இல்லாத நேரத்தில் கூட நான் கட்சியில் தொடர்ந்து நீடித்து வருகிறேன். சந்திரபாபு நாயுடு மீது நம்பிக்கை கொண்டு இருந்தேன். ஆனால் எனக்கு உரிய மரியாதை அளிக்காதது வேதனை அளிக்கிறது.

இனிமேல் நான் தீவிர அரசியலில் ஈடுபட திட்டமிட்டு உள்ளேன். பிரதமர் மோடியின் திட்டங்கள் சிறப்பாக உள்ளது. அவரது திட்டங்கள் நாட்டுக்கு தேவையாக உள்ளது.

பாரதிய ஜனதா கட்சியினர் அழைத்தால் அந்த கட்சியில் சேர தயாராக இருக்கிறேன். எனது அரசியல் வாழ்க்கை மூலம் எஸ்.சி., எஸ்.டி. பிரிவினருக்கு உள்ளது போல பிற்படுத்தப்பட்ட சமூகத்தினர் முன்னேற தனியாக சட்டம் கொண்டு வர முயற்சி செய்வேன் என்று நடிகர் சுமன் கூறினார்.

நான் 36 ஆண்டுகளாக சினிமாவில் உள்ளேன். தெலுங்கு, தமிழ், கன்னடம், மலையாளம் உள்பட 250க்கும் அதிகமான படங்களில் நடித்து உள்ளேன். இன்றும் நான் தெலுங்கு, தமிழ் படங்களில் பிசியாக உள்ளேன். ருத்ரமாதேவி படத்தில் வில்லனாக நடித்து உள்ளேன். நான் நடித்த சித்தி படம் ஜனவரி மாதம் ரிலீஸ் ஆக உள்ளது என்றும் நடிகர் சுமன் கூறினார்.

English summary

Noted Telugu film actor Suman will join the Bharatiya Janata Party.