பைவ் ஸ்டார் ஹோட்டல் எல்லாம் இல்லைங்க... மற்ற கைதிகளை போல்தான் சசிகலாவும்... தினகரன்

சிறையில் பைவ் ஸ்டார் ஹோட்டல் ஏதுமில்லை என்று நடிகர் கமல்ஹாசனுக்கு டிடிவி தினகரன் பதிலடி கொடுத்துள்ளார்.

By Lakshmi Priya

Updated: Thursday, August 3, 2017, 10:44 [IST]

பெங்களூர்: சிறையில் சசிகலா மற்ற கைதிகளை போல் தான் உள்ளார் என்றும் அவருக்கு சிறையில் பைவ் ஸ்டார் ஹோட்டல் எல்லாம் இல்லை என்றும் தினகரன் தெரிவித்துள்ளார்.

டிடிவி தினகரனை எடப்பாடி அணியினர் ஓரங்கட்டிவிட்டனர். அவருக்கு எதிரான கருத்துகளை அமைச்சர் ஜெயக்குமார் அள்ளி வீசிவருகிறார். இது குறித்து ஆலோசனை நடத்த சசிகலாவை கடந்த சில நாள்களுக்கு முன்பு, அதாவது திகார் சிறையில் இருந்து ஜாமீனில் வெளியே வந்தவுடன் முதல் முறையாக சந்தித்து பேசினார்.

60 நாள்கள் காலக்கெடு

அப்போது கட்சியை தனது கட்டுப்பாட்டில் கொண்டு வர சசிகலா தினகரனுக்கு 60 நாள் கால அவகாசம் வழங்கியதாக தெரிகிறது. அதன்படி அந்த அவகாசம் வரும் 4-ஆம் தேதியுடன் முடிவடைகிறது. இந்நிலையில் சசிகலாவுக்கு சிறையில் சிறப்பு வசதிகள் செய்யப்பட்டுள்ளதாக ரூபா வெளிப்படுத்தியதன் பின்பு பெரும் பரபரப்பு ஏற்பட்டது.

அதிகாரிகள் மாற்றம்

அதிகாரிகள் மாற்றப்பட்டதை தொடர்ந்து சிறையில் அதிகாரிகள் கெடுபிடி காட்டி வருகின்றனர். கடந்த 20-ஆம் தேதி சசிகலாவை சந்திக்க தினகரன் பெங்களூர் சென்றிருந்தார். ஆனால் அவர் நேரம் தவறி வந்ததால் அவருக்கு அனுமதி மறுக்கப்பட்டது.

மீண்டும் சந்திப்பு

இந்நிலையில் இன்று சசிகலாவை தினகரன் சந்தித்து பேசினார். அதைத் தொடர்ந்து செய்தியாளர்களுக்கு அவர் பேட்டியளித்தார். அப்போது தினகரன் கூறுகையில், யாருக்கு எப்போது எந்த ஆபரேசன் செய்ய வேண்டும் என்று எனக்கு தெரியும். ஆபரேசன் செய்யும் போது அதை செய்வேன்.

எந்த சலுகையும் இல்லை

சசிகலாவிற்கு எந்த சலுகையும் அளிக்கப்படவில்லை. ஒன்றரை மணிநேரம் காத்திருந்தே சசிகலாவை சந்தித்தேன். மற்றவர்கள் சொல்வது போல் உள்ளே பைவ் ஸ்டார் ஹோட்டல் எதுவுமில்லை. பள்ளிக்காலத்தில் இருந்தே நான் கமல் ரசிகன். அவர் அரசியலுக்கு வந்தால் வரவேற்பேன் என்றார்.

கமல் கிண்டல்

கடந்த வாரத்துக்கு முந்தைய வாரம் பிக்பாஸ் வீட்டில் இருந்து வெளியேற்றப்பட்ட நமிதாவிடம் பிக்பாஸ் வீடு எப்படி இருக்கிறது என்று அவரிடம் கமல் கேட்டார். அதற்கு அவர் பிக்பாஸ் வீடு ஒரு ஃவைவ் ஸ்டார் ஜெயில் என்றார். அதற்கு பதிலளித்த கமல் இது ஜெயில் இல்லை... ஆனால் வெளியில் வேற ஃபைவ் ஸ்டார் ஜெயில்லாம் இருக்கு என்று கூறியிருந்தது குறிப்பிடத்தக்கது.