பாஜக மூத்த தலைவர் எல்.கே.அத்வானிக்கு மீண்டும் உடல்நலக்குறைவு.. அப்பல்லோ மருத்துவமனையில் அனுமதி

டெல்லி: பாஜக மூத்த தலைவர் எல் கே அத்வானி உடல்நலக்குறைவு காரணமாக டெல்லியில் உள்ள தனியார் மருத்துவமனையில் அனுமதிக்கப்பட்டுள்ளார். அவரது உடல் நிலையை மருத்துவர்கள் தீவிரமாக கண்காணித்து வருகிறார்கள்.

பாஜகவின் மூத்த தலைவரும், நாட்டின் முன்னாள் துணை பிரதமருமான எல்.கே.அத்வானிக்கு 96 வயதாகிறது. வயோதிகம் மற்றும் உடல்நலக் குறைவு காரணமாக பாதிக்கப்பட்ட எல்.கே.அத்வானிக்கு அவரது வீட்டிலேயே மருத்துவ சிகிச்சைகள் வழங்கப்பட்டு வந்தது.

இந்நிலையில் கடந்த ஜூன் 26ம் தேதி இரவு அவரது உடல்நிலை கடுமையாக பாதிக்கப்பட்டது. இதை தொடர்ந்து டெல்லி எய்ம்ஸ் மருத்துவமனையில் அவர் உடனடியாக சிகிச்சைக்காக அனுமதிக்கப்பட்டார். அங்கு அவருக்கு மருத்துவர்கள் தீவிர சிகிச்சை அளித்து வந்தனர். இந்நிலையில் மருத்துவர்கள் அளித்த சிகிச்சையால் எல்.கே.அத்வானியில் உடல் நிலையில் முன்னேற்றம் ஏற்பட்டது. இதைதொடர்ந்து அவர் ஆம்புலன்ஸ் மூலம் வீட்டிற்கு அழைத்துச் செல்லப்பட்டார்.

கடந்த ஒரு வாரமாக வீட்டில் இருந்த எல்கே அத்வானிக்கு மீண்டும் உடல் நலக்குறைவு ஏற்பட்டுள்ளது. இதையடுத்து டெல்லியில் உள்ள அப்பல்லோ மருத்துவமனையில் இரவு அனுமதிக்கப்பட்டார். அவரது உடல் நிலை சீராக இருப்பதாகவும், தொடர்ந்து சிகிச்சை அளிக்கப்பட்டு வருவதாகவும் மருத்துவமனை நிர்வாகம் தெரிவித்துள்ளது.

இந்த தகவலை டாக்டர் வினித் பூரி தெரிவித்துள்ளார். இதனிடையே பாஜக மூத்த தலைவர் அத்வானியின் உடல்நிலை குறித்து பாஜக தலைவர்கள் மருத்துவமனை நிர்வாகத்திடம் கேட்டறிந்து வருகிறார்கள்..

English summary

Veteran BJP leader Lal Krishna Advani admitted to Apollo Hospital under the observation of Dr Vinit Suri at 9 pm. He is under observation and stable.