அன்று மம்தாவின் வலது கரம்; இன்று பாஜகவின் நிழல்.. மம்தாவை எதிர்த்து சுவேந்து அதிகாரி போட்டி!

Published: Saturday, March 6, 2021, 20:30 [IST]

Subscribe to Oneindia Tamil

கொல்கத்தா: மேற்கு வங்க தேர்தலில் பாஜக சார்பில் போட்டியிடும் 57 தொகுதிகளுக்கான முதற்கட்ட வேட்பாளர் பட்டியலை பாஜக வெளியிட்டுள்ளது.

முடிந்தால் நந்திகிராமில் போட்டியிடுங்கள் என்று மம்தாவுக்கு சுவேந்து அதிகாரி சவால் விட்டார். அந்த சவாலை ஏற்று மம்தாவும் நந்திகிராம் போட்டியிடுவதால் தேர்தல் களம் மிகவும் சூடுபிடித்துள்ளது.

மேற்கு வங்க தேர்தல் களம் சூடுபிடித்துள்ளது

தமிழகத்தைப்போல் மேற்கு வங்க தேர்தல் களமும் சூடுபிடித்துள்ளது. அங்கு இந்த முறை ஆட்சியை பிடித்து விட வேண்டும் என்பது பாஜகவின் நீண்ட நாள் சபதம். இதற்கு பல முன்பே திட்டம் வகுத்து விட்டார் அமித்ஷா. இதற்காக திரிணாமுல் கட்சியின் கூடாரத்தில் இருந்து ஒவ்வொருவராக பாஜக பக்கம் கொண்டு வந்தார். மம்தாவின் வலது கரமாக விளங்கிய சுவேந்து அதிகாரி உள்பட பல மூத்த தலைவர்கள் அமித்ஷா சொல் கேட்கும் கிளிப்பிள்ளையாக அப்படியே பாஜக பக்கம் ஒதுங்கினர்.

பாஜக-திரிணாமுல் விறுவிறு போட்டி

தொடர்ந்து பிரதமர் மோடி, அமித்ஷா, பாஜக தேசிய தலைவர் ஜே.பி.நட்டா என்று மொத்த பாஜக அணியே மேற்கு வங்கத்தில் வலம் வந்தது. ஆனால் தான் எதற்கும் சளைத்தளவர் அல்ல என்பதை மம்தா நிரூபித்தார். பாஜகவுக்கு எதிராகவும், தனது கட்சியில் இருந்து சென்றவர்களுக்கு எதிராகவும் வீறு கொண்டு முழங்கினார் மம்தா. கிரிக்கெட் வீரர் மனோஜ் திவாரி மற்றும் சில பிரபல பெங்காலி நடிகர்களை தன்பக்கம் இழுத்துக் கொண்டார்.

பாஜக வேட்பாளர் பட்டியல் வெளியீடு

மேற்கு வங்கத்தில் மொத்தமுள்ள 294 தொகுதிகளுக்கு 291 தொகுதிகளில் திரிணாமுல் காங்கிரஸ் கட்சி போட்டியிடும் வேட்பாளர்கள் பட்டியலை மம்தா பானர்ஜி நேற்று அறிவித்தார். மம்தாவின் வலதுகரமாக இருந்து கருத்து வேறுபாட்டால் தற்போது பாஜக பக்கம் ஒதுங்கி இருக்கும் சுவேந்து அதிகாரியின் சவாலை ஏற்று நந்திகிராம் தொகுதியில் போட்டியிடுவதாக அறிவித்துள்ளார் மம்தா. இந்த நிலையில் மேற்கு வங்க தேர்தலில் பாஜக சார்பில் போட்டியிடும் 57 தொகுதிகளுக்கான முதற்கட்ட வேட்பாளர் பட்டியலை பாஜக வெளியிட்டுள்ளது.

மேற்கு வங்கம் ஆவலுடன் உள்ளது

நந்திகிராம் தொகுதியில் முதல்வர் மம்தா பானர்ஜியை எதிர்த்து சமீபத்தில் திரிணமூல் காங்கிரஸில் இருந்து விலகி பாஜகவில் ஐக்கியமான சுவேந்து அதிகாரி போட்டியிடுவார் என அறிவிக்கப்பட்டுள்ளது.முடிந்தால் நந்திகிராமில் போட்டியிடுங்கள் என்று மம்தாவுக்கு சுவேந்து அதிகாரி சவால் விட்டார். அந்த சவாலை ஏற்று மம்தாவும் நந்திகிராம் போட்டியிடுவதால் தேர்தல் களம் மிகவும் சூடுபிடித்துள்ளது. மம்தாவும், சுவேந்துவும் ஒருவரையொருவர் பிரசாரம் செய்வதை பார்க்க மேற்கு வங்கமே ஆவலுடன் உள்ளது.மொய்னா சட்டமன்றத் தொகுதியில் இந்திய முன்னாள் கிரிக்கெட் வீரர் அசோக் திண்டா போட்டியிடுகிறார்.

Published On March 6, 2021