எந்த பாலிவுட் நடிகை உயரமானவர்?: அரசு வேலைக்கான தேர்வில் கேட்கப்பட்ட 'திடுக்' கேள்வி
டெல்லி: ஸ்டாஃப் செலக்ஷன் கமிஷன் தேர்வில் எந்த பாலிவுட் நடிகை உயரமானவர் என்று கேள்வி கேட்கப்பட்டுள்ளது.
மத்திய அமைச்சகங்கள் மற்றும் பிற அரசு துறைகளுக்கு ஆட்களை தேர்வு செய்யும் ஸ்டாஃப் செலக்ஷன் கமிஷன் தேர்வு நடைபெற்றது. தேர்வு அறைகளில் அளிக்கப்பட்ட வினாத்தாளை பார்த்தவர்கள் அதிர்ச்சி அடைந்தனர்.
காரணம் ஒரு கேள்வியில் எந்த பாலிவுட் நடிகை உயரமானவர் என்று கேட்கப்பட்டு அதற்கு பதிலாக ஹூமா குரேஷி, கத்ரீனா கைஃப், தீபிகா படுகோனே மற்றும் ப்ரீத்தி ஜிந்தா ஆகியோரின் பெயர்கள் அளிக்கப்பட்டிருந்தன. இந்த நான்கு பேரில் ஒருவரின் பெயரை தேர்வாளர்கள் தேர்வு செய்ய வேண்டும்.
எந்த மாதத்தில் காதலர் தினம் கொண்டாடப்படுகிறது என்று ஒரு கேள்வி கேட்கப்பட்டிருந்தது. மேலும் ஒரு கேள்வியில் அனைத்து பெண்களும் பூனைகள், அனைத்து பூனைகளும் எலிகள் இதை லாஜிக் மூலம் தீர்க்க வேண்டும் என்று கேட்கப்பட்டிருந்தது.
இது குறித்து ஸ்டாஃப் செலக்ஷன் கமிஷன் தலைவர் ஏ. பட்டாச்சார்யா கூறுகையில்,
இது மோசமான கேள்விகள். இதை பார்த்து வேதனை அடைந்தேன். கேள்விகளை சில ஆசிரியர்கள் தயாரிக்க அதை நிபுணர்கள் குழு ஒன்று தேர்வு செய்தது என்றார்.
இந்நிலையில் இது குறித்து உரிய விளக்கம் அளிக்க வேண்டும் என்று கேரளாவில் உள்ள பெண்கள் கமிஷன் தெரிவித்துள்ளது. இதற்கிடையே பொறுப்பில்லாத வினாத்தாளுக்காக ஸ்டாஃப் செலக்ஷன் கமிஷன் மன்னிப்பு கேட்டுள்ளது.