103 ஐ கைபிடித்த 99... தள்ளாத வயதிலும் தளராத காதல்...

பராகுவே: காதல் கடந்தாலும் காதல் ஜெயிக்கும் என்று நிரூபித்துள்ளனர் பராகுவே நாட்டைச் சேர்ந்த வயதான காதல் ஜோடிகள். 80 ஆண்டுகள் சேர்ந்து வாழ்ந்து தற்போது பிள்ளைகள், பேரப்பிள்ளைகள் முன்னிலையில் திருமணம் செய்து கொண்டுள்ளனர்.

பராகுவே நாட்டைச் சேர்ந்த ஜோஸ் மேனுவல் ரெய்லா, அவரது காதலி மார்டினா லோபஸ். இருவரும் காதலித்து திருமணம் செய்து கொள்ளாமலேயே ஒன்றாக வாழத் தொடங்கிவிட்டனர்.

அதன்பிறகு குழந்தைகள் பிறந்து பேரப்பிள்ளைகளை பார்த்த பின்னர் சுமார்49 ஆண்டுகள் கழித்து சாதாரண முறையில் திருமணமும் செய்து கொண்டனர்.

ஆனால், பாதிரியாரின் முன்னிலையில் அந்த திருமணம் நடைபெறவில்லை. இது ஒரு மிகப்பெரிய மனக்குறையாக காதலி மார்டினாவுக்கு இருந்துள்ளது.

இதனால், தற்போது குடும்பத்தாரின் ஒத்துழைப்போடு, பாதிரியார் முன்னிலையில் இந்த பிரம்மாண்ட திருமண நிகழ்ச்சி நடைபெற்றுள்ளது.

வயதான தம்பதியர்

பராகுவேவில் சான்டா ரோஸாவில் உள்ள இந்த மிகவும் வயதான புது மண காதல் தம்பதிகளின் திருமணம் அங்குள்ள தேவாலயத்தில் முறைப்படி நடைபெற்றது. பிறகு உற்சாகமான விருந்து நிகழ்ச்சி அவர்களது இல்லத்தில் நடத்தப்பட்டது.

வீல் சேரில் அமர்ந்து

மணமகள் கிறித்துவ முறைப்படி வெள்ளை நிறை நீண்ட ஆடையை உடுத்தி வந்திருந்தார். தள்ளாத வயதில் நடக்க முடியாததால் மாப்பிள்ளை மேனுவல் வீல் சேரில் அமர்ந்தபடி தனது காதலியின் கரம் பிடித்தார்.

8 குழந்தைகள் 50 பேரப்பிள்ளைகள்

இந்த திருமணத்துக்கு முக்கிய விருந்தினர்களாக, ஜோஸ் மேனுவல் ரெய்னா - மார்டினா லோபஸ் தம்பதிகளுக்குப் பிறந்த 8 பிள்ளைகளும், 50 பேரக் குழந்தைகளும், 35 கொள்ளுப் பேரக் குழந்தைகளும், 20 எள்ளுப் பேரக் குழந்தைகளும் கலந்து கொண்டதுதான் திருமணத்தின் ஹை லைட்.

80 ஆண்டு மணவாழ்க்கை

திருமணம் செய்து கொண்டால் காதல் குறைந்துவிடும் என்று நினைத்ததோ இந்த ஜோடி. சுமார் 80 ஆண்டுகள் சேர்ந்து வாழ்ந்து, தற்போது திருமணம் செய்து கொண்டுள்ளனர்.

நீங்கிய மனக்குறை

பாதிரியார் முன்பு திருமணம் செய்து கொள்ள வேண்டும் என்ற மார்டினாவினாவின் மனக்குறை நீங்கியுள்ளதாம். இது குறித்து பேசிய மணமகள் மார்டினா, நான் தற்போது மிகவும் உணர்ச்சிவயப்பட்ட நிலையில் உள்ளேன். எங்களது உறவு பாதிரியாரின் வாழ்த்துக்களைப் பெற்றுள்ளது என்று நினைக்கும் போது மிகவும் மகிழ்ச்சியாக உள்ளது என்றார். காதல் கடந்தாலும் உண்மைக் காதல் என்றைக்கும் மாறாது என்று நிரூபித்துள்ளது இந்த வயதான காதல் ஜோடி.

English summary

After spending many years together, most couples feel the need to make their relationship official through marriage.This man and wife in Paraguay held out for 80 years before finally deciding to marry one another at 103 and 99 respectively.