தனது கடைசி நிமிடம் வரை கம்பீரமாகவே வாழ்ந்தார் சதாம்: ஈரான் பாதுகாப்பு அதிகாரி தகவல்

பாக்தாத்: தூக்கிலிடப்பட்ட கடைசி நிமிடம் வரை கம்பீரமாகவே நடந்து கொண்டதாக, சதாம் ஹூசைனை தூக்கிலிடும் போது பணியில் இருந்த முன்னாள் தேசிய பாதுகாப்பு ஆலோசகர் தெரிவித்துள்ளார்.

கடந்த 1982ம் ஆண்டு ஈராக் அதிபராக இருந்த நேரத்தில், துஜெய்ல் பகுதியில் 148 ஷியா பிரிவு முஸ்லிம்களை கொன்றதாக சதாம் உசேன் மீது பாக்தாத் சிறப்பு கோர்ட்டில் வழக்கு தொடரப்பட்டது. வக்கீல்கள் படுகொலை மற்றும் நீதிபதிகள் மாற்றம் என பல்வேறு பிரச்னைகளைத் தாண்டி, முதல் குற்றவாளியாக அறிவிக்கப்பட்ட சதாம் உசேன், சதாமின் சகோதரர் பர்சான் அல் திக்ரிதி மற்றும் ஈராக் முன்னாள் நீதிபதி அவாத் அல் பன்தர் ஆகிய மூவருக்கும் தூக்கு தண்டனை விதித்து பாக்தாத் சிறப்பு கோர்ட் உத்தரவிட்டது.

அதனைத் தொடர்ந்து 2006ம் ஆண்டு டிசம்பர் 23ம் தேதி பாக்தாதில் உள்ள ரகசிய இடத்தில் சதாம் உசேன் தூக்கிலிடப்பட்டார். அப்போது அவரது மரண தண்டனையை நேரில் பார்த்த அந்நாட்டின் முன்னாள் தேசிய பாதுகாப்பு ஆலோசகரான முவாஃப்க் அல் ரூபேயின், ‘தூக்கு மேடைக்கு சதாமை அழைத்துச் சென்றபோது அவர் எந்தவித எதிர்ப்பும் காட்டாமல் அமைதியாகவும், நிதானமாகவும்,திடமாகவும் நடந்து சென்றார்.

தூக்கு மேடைக்கு போகும் போது கையில் திருக்குரானை ஏந்திச் சென்றார். தூக்கு போடும்போது அணியும் முகமூடியை அணிய மறுத்த அவர் தூக்குக் கயிற்றுக்கு தலையைக் காட்டினார்' எனத் தெரிவித்துள்ளார்.

மேலும், தண்டனை நிறைவேற்றப்பட்டபோது அமெரிக்க அதிகாரிகள் யாரும் அந்த இடத்தில் இல்லை. பொதுவாக மரண தண்டனை நிறைவேற்றப் படும் போது கடவுளே என்னைக் காப்பாற்று என்றோ அல்லது என் பாவங்களை மன்னியுங்கள் என்றோ கூறுவதை நான் கேட்டிருக்கிறேன். ஆனால், சதாம் அந்த விதமாக எதுவும் தெரிவிக்கவில்லை.

தூக்கிலிடப் படப்போவதை எண்ணி அவர் சிறிதும் கலக்கமடையவில்லை. இத்தகைய மன உறுதி மிக்க மனிதனை நான் இதுவரைச் சந்தித்ததில்லை' என இவ்வாறு அவர் கூறியுள்ளார்.

English summary

Mowaffak al-Rubaie sits in his office with a statue of Saddam Hussein behind him, the rope used to hang the dictator around its neck, recalling his final minutes. The former national security advisor, who oversaw Saddam's 2006 execution, said he remained strong until the end, and never expressed any regret.