அஜித் ஓட்டிய கார் டயர் வெடித்தது.. ரேஸின்போது திடீரென புகை வந்ததால் பரபரப்பு!

Updated: Sunday, May 18, 2025, 18:31 [IST]

Subscribe to Oneindia Tamil

ஆம்ஸ்டர்டாம்: ஐரோப்பாவில் நடைபெற்று வரும் GT4 கார் பந்தயத்தில் நடிகர் அஜித் குமார் ஓட்டிய கார் டயர் வெடித்ததால் பரபரப்பு ஏற்பட்டது.

ரேஸில் அஜித் ஓட்டிய காரின் டயர் திடீரென வெடித்து புகை வந்தது. உடனே காரை நிறுத்தியதால் காயமின்றி தப்பியுள்ளார் அஜித். அஜித் ஓட்டிய கார் டயர் வெடித்த தகவல் அவரது ரசிகர்கள் மத்தியில் அதிர்ச்சியை ஏற்படுத்தி உள்ளது.

Ajith Kumar Escapes Unharmed After Tire Burst During GT4 European Car Race

நடிகர் அஜித் குமார் நெதர்லாந்தில் நடைபெற்று வரும் GT4 ஐரோப்பிய தொடரில் பங்கேற்று உள்ளார். அவரது மேனேஜர் சுரேஷ் சந்திரா சமூக வலைதளங்களில் வெளியிட்ட தகவலின்படி, அஜித் தொடர்ந்து 60 நிமிடங்கள் தனியாக கார் ஓட்டும் சவாலை ஏற்றுள்ளார் அஜித். இந்த வகை பந்தயத்தில் இணை ஓட்டுநர் இருக்க மாட்டார்.

நவம்பர் மாதத்தில் தான் அடுத்த திரைப்படத்தின் படப்பிடிப்பு தொடங்கவுள்ளதால், தற்போது அஜித் தனது முழு கவனத்தையும் மோட்டார் ஸ்போர்ட்ஸில் செலுத்தி வருகிறார். தினமும் கடுமையான உடற்பயிற்சி, உணவுக் கட்டுப்பாடு, மற்றும் குறைந்தது 5 - 6 மணி நேரம் பந்தய பயிற்சியில் ஈடுபட்டு வருகிறார் எனக் கூறப்படுகிறது.

சர்வதேச பந்தய சர்க்யூட்டுகளில் ஏற்கனவே பல சாதனைகளை படைத்துள்ள அஜித், இந்த முறையும் சிறப்பான செயல்திறனை வெளிப்படுத்துவார் என எதிர்பார்க்கப்படுகிறது. இந்நிலையில் ஜிடி 4 ஐரோப்பிய கார் பந்தயம் இரண்டு கட்டங்களாக நடைபெற்று வருகிறது.

மே 17-ம் தேதியான நேற்று இந்த ரேஸ் தொடங்கியது. இந்தப் போட்டியின் இரண்டாவது சுற்று இன்று இந்திய நேரப்படி மதியம் 3:40 மணிக்கு தொடங்கியது. இதில் நடிகர் அஜித்குமார் போர்ஷியா அணி சார்பில் பங்கேற்றார்.

இந்நிலையில், இன்று நடைபெற்ற ரேஸின் போது, அஜித்குமார் ஓட்டிய கார் டயர் வெடித்ததால் பரபரப்பு ஏற்பட்டது. ரேஸில் அஜித் ஓட்டிய காரின் டயர் வெடித்து புகை வந்தது. உடனே காரை நிறுத்தியதால் காயமின்றி தப்பியுள்ளார் அஜித். விபத்தை தொடர்ந்து, கார் ரேஸ் டிராக்கில் இருந்து கிரேன் மூலம் அகற்றப்பட்டுள்ளது. டார்க் சர்க்யூட்டில் கார் நின்ற பிறகு, டயர் மாற்றப்பட்டு மீண்டும் நடிகர் அஜித் பந்தயத்தில் பங்கேற்றார்.