Crash Diet: நடிகர் அர்னால்டு ஷுவார்செனேக்கரின் புதிய டயட்! எடையை குறைக்காதாம்! அப்புறம் எதுக்காம்?

வாஷிங்டன்: ஹாலிவுட் நடிகர் மற்றும் முன்னாள் பாடிபில்டிங் சாம்பியனான அர்னால்ட் ஷுவார்செனேக்கர், 2026 ஆம் ஆண்டுக்கான தனது புதிய "க்ராஷ் டயட்" திட்டத்தை அறிவித்துள்ளார். இந்தத் திட்டம் உடல் எடையைக் குறைப்பதற்கானது அல்ல, மாறாக எதிர்மறை எண்ணங்களை நீக்கி மனநலனை மேம்படுத்துவதற்கான முயற்சி என்று The New York Post தெரிவித்துள்ளது. அர்னால்ட் ஷுவார்செனேக்கருக்கு தற்போது 78 வயதாகிறது.

அர்னால்ட் தனது 'பம்ப்கிளப்' செய்திக்கு அனுப்பிய கடிதத்தில், பொதுவாக "க்ராஷ் டயட்கள்" தவிர்க்கப்பட வேண்டியவை என்பதை ஒப்புக் கொண்டார். "விரைவான தீர்வுகள் நீடித்த பலன் தராது என்று நாம் எப்போதும் சொல்வது ஆச்சரியமாக இருக்கலாம்; ஆனால் இந்த டயட் உங்கள் மூளைக்கானது" என்று அவர் குறிப்பிட்டுள்ளார்.

குறைந்தது ஒரு வாரமாவது இந்த மனதைச் சுத்திகரிக்கும் முயற்சியை மேற்கொள்ளுமாறு அர்னால்ட் தனது ரசிகர்களைக் கேட்டுக் கொண்டார். எதிர்மறை எண்ணங்கள், சுய விமர்சனம் மற்றும் பிறர் மீதான விமர்சனங்களை நீக்கும்படி அவர் வலியுறுத்தினார். "எதிர்மறைத்தன்மை உங்களை உண்மையில் அழித்துவிடும்," என்று எச்சரித்த அவர், அது உடல்ரீதியாகவும் தீங்கு விளைவிக்கும் என்றும் கூறினார்.

தி போஸ்ட் தகவல் படி, அர்னால்டின் ஊக்கமூட்டும் செய்திகள் மற்றும் ஆலோசனைகளைப் பின்பற்றும் ரசிகர்கள் மத்தியில் இத்திட்டம் பெரிய வரவேற்பைப் பெற்றது. ஷுவார்செனேக்கரின் இந்த 'மூளை டயட்' திட்டம், மனநலம் மற்றும் நேர்மறை சிந்தனையை மேம்படுத்தும் உலகளாவிய இயக்கத்துடன் ஒத்துப்போகிறது.

மன மற்றும் உடல் நலனை மேம்படுத்த, ஒரு வார கால 'பூஜ்ஜிய எதிர்மறை சிந்தனை உணவு' (Zero Negativity Diet) திட்டத்தை மேற்கொள்ள அர்னால்ட் அழைப்பு விடுத்தார். நம்பிக்கை இழத்தல், கோபம் மற்றும் 'டூம்ஸ்க்ரோலிங்' போன்றவற்றைத் தவிர்க்குமாறு அவர் அறிவுறுத்தினார். மேலும், நம்பிக்கையுடன் வாழ்பவர்கள் நீண்ட ஆயுளுடன் இருப்பார்கள் என ஆய்வுகள் காட்டுவதையும் அவர் சுட்டிக்காட்டினார்.

இந்தத் திட்டத்தில் மூன்று முக்கிய படிகள் உள்ளன: 1. சமூக வலைதளப் பயன்பாட்டை ஒரு நாளைக்கு மூன்று முறை, தலா 10 நிமிடங்களுக்கு மிகாமல் கட்டுப்படுத்த வேண்டும்.

2. எதிர்மறைச் சூழ்நிலைகளைச் சரிசெய்ய, ஒரு வேலைக்கான விண்ணப்பப் பட்டியலை உருவாக்குவது போன்ற ஆக்கபூர்வமான செயல்களில் ஈடுபட வேண்டும்.

3. சவால்கள் தான் மன வலிமையைத் தரும் என்பதால், அவற்றுக்கும் நன்றி செலுத்தி, தினசரி நன்றியுணர்வுடன் இருக்க வேண்டும்.

தனது கடினமான இளமைக் காலமே இன்றைய நிலைக்கு தன்னை வழிநடத்தியதாக அர்னால்ட் நினைவு கூர்ந்தார். எதிர்மறை எண்ணங்களைக் குறைப்பது வாழ்க்கையைச் சுறுசுறுப்பாக்குவது மட்டுமல்லாமல், அதை முழுமையாக மாற்றவும், சில சமயங்களில் உயிரைக் காக்கவும் சக்தி கொண்டது என தெரிவித்திருந்தார்.