நாராயணா... ஒரு மூட்டைப் பூச்சிக்கு இந்த அக்கப் போரா நாராயணா... ஐ.நாவில்!

ஐ.நா.: எங்க வீட்ல, உங்க வீட்ல, அவங்க வீட்ல மட்டும்தான் மூட்டைப் பூச்சி தொல்லை இருக்குன்னு நினைக்காதீங்க மக்களே.. ஆனானப்பட்ட ஐ.நாவிலேயே இந்தத் தொல்லை வந்து விட்டதாம்.

சமீபத்தில் அங்கு சில மூட்டைப் பூச்சிகளைப் பிடித்துள்ளனர். ஐ.நா. சபையில் இப்படி மூட்டைப் பூச்சிகள் சிக்கியது நியூயார்க் நகர மக்களையும் அதிர வைத்துள்ளது.

என்னது நம்ம நாட்டில், நம்ம ஊரில் மூட்டைப் பூச்சியா என்று அவர்கள் அதிர்ச்சி காட்டியுள்ளனர். நியூயார்க் நகருக்குள்தான் ஐ.நா. சபை அலுவலகம் உள்ளது என்பது குறிப்பிடத்தக்கது. ரத்தத்தைக் குடிக்கும் தீவிரவாதிகளை தடுக்க முடிந்த அமெரிக்கர்களால் இந்த ரத்தம் உறிஞ்சும் பூச்சிகளை ஒழிக்க முடியாமல் போனது ஆச்சரியம்தான்.

2 அலுவலகத்தில்

ஐ.நா. செயலக கட்டடத்தின் 34வது மாடியில் இரண்டு இடங்களில் மூட்டைப் பூச்சிகள் சிக்கினவாம். இதையடுத்து அந்தப் பகுதியை சுத்தம் செய்துள்ளனர். உடனடியாக பூச்சி மருந்து அடிக்கப்பட்டு மேலும் பூச்சிகள் வராத அளவுக்கு தடுப்பு நடவடிக்கை எடுக்கப்பட்டுள்ளதாம்.

நிலைமை கட்டுக்குள் உள்ளதாம்

தற்போது நிலைமை கட்டுக்குள் இருப்பதாக ஐ.நா. செய்தித் தொடர்பாளர் பர்ஹாத் ஹக் கூறியுள்ளார். இதுகுறித்து ஐ.நா. வெளியிட்டுள்ள ஒரு அறிக்கையில், மிகச் சிறிய அளவில்தான் மூட்டைப் பூச்சிகள் சிக்கின. பயப்படும்படியாக ஒன்றும் இல்லை. 2 அலுவலகப் பகுதிகளில் மட்டுமே இருந்தது. அந்த இரண்டு இடத்தையும் ஒருவர்தான் பயன்படுத்தி வருகிறார் என்று கூறப்பட்டிருந்தது.

6 பேர் தற்காலிக இடமாற்றம்

மூட்டைப் பூச்சி கண்டுபிடிக்கப்பட்ட இடத்திற்கு அருகே வேலை பார்த்து வந்த 6 பேர் தற்போது தற்காலிகமாக வேறு இடத்திற்கு மாற்றப்பட்டுள்ளனர். அந்த இடத்தை பூச்சி மருந்து அடிப்பவர்கள் தங்களது கட்டுப்பாட்டில் கொண்டு வந்துள்ளனராம். தொடர்ந்து கண்காணித்தும் வருகின்றனராம்.

கடைசியாக 2010ல்

ஐ.நா. சபையில் கடைசியாக 2010ம் ஆண்டுதான் மூட்டைப் பூச்சி கண்டுபிடிக்கப்பட்டது. அதன் பிறகு அது முற்றிலும் ஒழிக்கப்பட்டிருந்தது. தற்போது அது மீண்டும் தலை தூக்கியுள்ளது.

வீட்டில் இல்லை

இருப்பினும் வெளிநாட்டு தூதர்கள் தங்கும் இல்லங்களில் மூட்டைப் பூச்சி தொல்லை இதுவரை இல்லை என்றும், இதுதொடர்பாக எந்தப் புகாரும் வரவில்லை என்றும் ஐ.நா. வட்டாரத் தகவல்கள் தெரிவித்துள்ளன.

அமெரிக்கா அமெரிக்காதான்.. மூட்டைப் பூச்சி வந்தாலும் கூட பெர்பெக்ட்டா ஆக்ஷன் எடுக்கிறாங்களே!

English summary

On Tuesday, staff at the U.N.'s New York headquarters got a message that should send chills down the spine of any New Yorker. The Department of Management wishes to inform staff that bedbugs have been detected in an isolated area of the Secretariat building.