ஆப்பிரிக்காவிலும் பறக்கப் போகும் மோடி கொடி.. கிளை திறக்கும் பாஜக!
நைரோபி: ஆப்பிரிக்க கண்டத்திலும் பாஜக தனது கிளையைத் திறக்கிறது. முதலில் கென்யாவிலும் பின்னர் படிப்படியாக ஆப்பிரிக்காவின் பிற நாடுகளிலும் பாஜக தனது கிளையைத் திறக்கவுள்ளது.
அடுத்த 15 நாட்களில் கென்யத் தலைநகர் நைரோபியில் தனது கட்சிக் கிளையைத் திறக்கவுள்ளதாம் பாஜக.
அடுத்து படிப்படியாக கிழக்கு ஆப்பிரிக்க நாடுகளிலும் தனது கிளைகளை பாஜக தொடங்கவுள்ளதாம்.
போன வாரம் கனடாவில்
கடந்த வாரம்தான் கனடா, டென்மார்க், உகாண்டா ஆகிய நாடுகளில் தனது கிளைகளைத் தொடங்கியது பாஜக.
அடுத்து எத்தியோப்பியா, ருவாண்டா
அடுத்து கென்யாவில் திறக்கிறது. இதைத் தொடர்ந்து எத்தியோப்பியா, ருவாண்டா, தான்ஸானியா, ஜிம்பாப்வே, ஜாம்பியா ஆகிய நாடுகளிலும் கிளைகளைத் திறக்கவுள்ளது.
ஓவர்சீஸ் பாஜக சார்பில்
இந்த பணிகளை வெளிநாட்டு பாஜக நண்பர்கள் அமைப்பு செய்து வருகிறது. இதுகுறித்து அமைப்பின் கென்ய நாட்டுத் தலைவரான விமல் சத்தா கூறுகையில், எங்களுக்கு அங்கு நல்ல கட்டமைப்பு உள்ளது. எனவேதான் ஆப்பிரிக்க நாடுகளிலும் கிளைகளைத் திறக்கிறோம். கென்யாவில் உள்ள ஒவ்வொரு முக்கிய நகரிலும் ஒருங்கிணைப்பாளர்கள் நியமிக்கப்பட்டு வருகின்றனர். இவர்கள் பாஜகவின் கென்ய கட்சிப் பணிகளைக் கவனித்துக் கொள்வார்கள்.
இந்தியாவுடன் இணைந்து செயல்பட வாய்ப்பு
ஆப்பிரிக்க நாடுகளில் திறக்கப்படும் பாஜக கிளைகள், இந்தியாவுடன் இந்த ஆப்பிரிக்க நாடுகளை இணைத்து செயல்பட வைக்க உதவும்.
இந்தியர்களுக்கு உதவும்
மேலும் ஆப்பிரிக்க நாடுகளில் வாழும் இந்தியர்களின் பிரச்சினைகளை உடனுக்குடன் தீர்க்கவும், அவர்களின் தேவையைப் பூர்த்தி செய்யவும் இவை இந்திய அரசுடன் இணைந்து செயல்பட உதவும்.
ஆப்பிரிக்க வளர்ச்சியில் இந்தியா முக்கியம்
ஆப்பிரிக்க நாடுகளின் வளர்ச்சியில் இந்தியாவின் பங்கு முக்கியமானது. எனவேதான் இங்கு பாஜகவின் கிளைகளைத் திறக்கிறோம் என்றார் சத்தா.
இந்தியாவில் முதலீடுகள் குவியும்
மேலும் அவர் கூறுகையில், இந்தியாவில் சிறந்த முதலீடுகளை ஆப்பிரிக்கர்கள் மேற்கொள்ளவும் இவை வகை செய்யும். இதற்கான நல்ல வாய்ப்புகளை எங்களது ஆப்பிரிக்க பாஜக கிளைகளும், பாஜகவின் வெளிநாட்டு நண்பர்கள் அமைப்பும் இணைந்து ஏற்படுத்த முயற்சிப்பார்கள்.
32 நாடுகளில் பாஜக நண்பர்கள் அமைப்பு
தற்போது ஆப்பிரிக்கா, ஐரோப்பா, அமெரிக்கா மற்றும் பிற நாடுகளில் பாஜகவின் நண்பர்கள் அமைப்புக்கு 32 கிளைகள் உள்ளன என்பது குறிப்பிடத்தக்கது.