மறைந்தார் இவோ.. மாபெரும் பிளாஸ்டிக் சர்ஜரி மேதை.. ஒலிம்பிக் ஜோதியைப் பெற்ற திருப்தியோடு மரணம்!

ரியோ டி ஜெனீரோ: இவோ பிதன்கய். பிரேசில் நாட்டின் மிகப் பெரிய பிளாஸ்டிக் சர்ஜரி மேதை. உலக அளவிலும் புகழ் பெற்றவர். இன்று இவர் உயிருடன் இல்லை. தனது 90வது வயதில் இன்று அவர் மரணமடைந்தார்.

இவரது வாழ்க்கையைப் போலவே இவரது மரணமும் உலக மக்களால் பேசப்படும் ஒன்றாக மாறிப் போய் விட்டது. ரியோவில் தொடங்கியுள்ள ஒலிம்பிக் போட்டியையொட்டி நடந்த ஒலிம்பிக் ஜோதி ஓட்டத்தின்போது கடைசியாக இவரிடம்தான் ஒலிம்பிக் ஜோதி ஒப்படைக்கப்பட்டது. அந்த சந்தோஷத்துடனேயே மரணத்தைத் தழுவியுள்ளார் இவோ.

மாரடைப்பால் இவோ மரணமடைந்ததாக அவரது செய்தித் தொடர்பாளர் தெரிவித்துள்ளார். சனிக்கிழமை இரவு மரணமடைந்தார் இவோ. வெள்ளிக்கிழமைதான் இவர் ஒலிம்பிக் ஜோதியைப் பெற்றார்.

இவோ, பிரேசில் மக்கள் மனதில் இடம் பிடிக்கக் காரணம் 1961ம் ஆண்டு நடந்த மிகப் பெரிய சர்க்கஸ் கூடார தீவிபத்துதான். நூற்றுக்கணக்கானோர் இந்த தீவிபத்தில் சிக்கி உடல் உறுப்புகள் சேதமடைந்தனர். அவர்களுக்கு இலவசமாகவே பிளாஸ்டிக் சர்ஜரி செய்து சரிப்படுத்தியவர் இவோ.

மக்களுக்காக செயல்பட்ட டாக்டர் என்றால் அது சாதாரண வார்த்தைதாதன். மாறாக மக்களின் சிறப்பான வாழ்க்கைக்காக பாடுபட்டவர் டாக்டர் இவோ என்று பிரேசில் நாட்டு தற்காலிக அதிபர் மிக்கல் டெமேர் புகழாரம் சூட்டியுள்ளார்.

உயிர் எந்தளவுக்கு முக்கியம் என்பதை மக்களுக்கு உணர்த்தியவர் டாக்டர் இவோ. மேலும் உடல் உறுப்பு குறைபாடு உள்ளவர்களுக்கு அதை சரி செய்ய இவர் காட்டிய வேகம், அக்கறை மிகப் பெரிய விஷயமாகும்.

English summary

Brazil plastic surgery maestro Ivo Pitanguy dies at the age of 90 at Rio . He was the last man to receive the Olympic torch on Friday.