கூகுளின் டிரைவர் இல்லாத காரில் பயணித்த பிரேசில் அதிபர்
கலிபோர்னியா: பிரேசில் அதிபர் தில்மா ரூசெப், கலிபோர்னியா கூகுள் தலைமை அலுவலகத்திற்கு சென்ற போது, அங்கு கூகுளின் தானே இயங்கும் காரில் பயணம் செய்தார்.
கார் ஆட்டோ மொபைல்தான் என்றாலும், அதனை இயக்க ஓட்டுநர் தேவை. ஆனால், கூகுள் நிறுவனம் தயாரித்துள்ள புதிய காரை இயக்க ஓட்டுநர் தேவையில்லை. மின் சக்தியில் இயங்கும் இந்தக் கார் கூகுள் மேப் வழிகாட்டுதலின் படி பயணம் செய்கிறது. செல்லும் வழியில் எதன் மீதும் மோதி விபத்து ஏற்படாமல் தடுக்க நவீன ரேடாரும், லேசர் சென்சாரும் இந்த காரில் உள்ளன.
மணிக்கு சுமார் 40 கிலோமீட்டர் வேகத்தில் மட்டுமே செல்ல முடியும். சோதனை அடிப்படையில் 25 கார்கள் மட்டுமே தற்போது தயாரிக்கப்பட்டுள்ளன.
இந்தக் காரைப் போக்குவரத்துச் சாலைகளில் சோதிப்பதற்கு அமெரிக்காவின் கலிபோர்னியா, நிவாடா ஆகிய மாகாணங்கள் மட்டுமே சட்ட ஒப்புதலைத் தந்துள்ளன.
இந்நிலையில், கலிபோர்னியாவில் கூகுளின் தலைமை அலுவலகத்திற்கு சென்றார் பிரேசில் அதிபர் தில்மா ரூசெப். அங்கு டிரைவர் இல்லாமல் இயங்கும் கூகுளின் தானியங்கி காரில் ஏறி சிறிது தூரம் அவர் பயணம் செய்தார்.