காட்டோட ராஜாவுக்கு இப்டி ஒரு நிலைமையா.. எருமையைவிட சிங்கத்தோட விலை குறைவா இருக்கே!

பாகிஸ்தானில் எருமையைவிட குறைவான விலைக்கு சிங்கங்கள் விற்பனை செய்யப்படுவது அதிர்ச்சியை ஏற்படுத்தியுள்ளது.

இஸ்லாமாபாத்: பாகிஸ்தானில் எருமை மாட்டைவிட குறைவான விலைக்கு சிங்கங்கள் விற்கப்படுகிறது என்ற அதிர்ச்சித் தகவல் தெரிய வந்துள்ளது.

நமது அண்டை நாடான பாகிஸ்தானில் மோசமான பொருளாதார நிலை நிலவி வருகிறது. எனவே, அங்கு உணவுப் பொருட்கள், பானங்கள் மட்டுமின்றி, கால்நடைகளின் விலையும் வரலாறு காணாத அளவு அதிகரித்துள்ளது. இதனால் பலர் தங்களிடம் உள்ள கால்நடைகளை பராமரிக்க இயலாமல் விற்று வருகின்றனர்.

இந்நிலையில், பாகிஸ்தானில் சிங்கத்தின் விலை, எருமை மாட்டின் விலையை விட குறைவாக இருப்பதாக செய்திகள் வெளியாகி இருப்பது அதிர்ச்சியை ஏற்படுத்தியுள்ளது.

குறைவான விலை

லாகூர் சஃபாரி மிருகக்காட்சியில் மொத்தம் 40 சிங்கங்கள் உள்ளன. அவற்றில் சில ஆப்பிரிக்க சிங்கங்களை விற்க முடிவெடுத்துள்ளதாக அந்நாட்டு ஊடகங்களில் செய்தி வெளியாகியுள்ளது. அதன்படி, தங்களிடம் உள்ள சிங்கம் ஒன்றின் விலை 1,50,000 பாகிஸ்தான் ரூபாய் என சம்பந்தப்பட்ட மிருகக்காட்சி சாலை விலை நிர்ணயித்துள்ளதாக அதில் கூறப்பட்டுள்ளது. அந்நாட்டைப் பொறுத்தவரை இது மிகக் குறைவான விலையாகக் கருதப்படுகிறது.

எருமையின் விலை அதிகம்

ஏனென்றால், பாகிஸ்தானில் ஆன்லைன் சந்தையில் ஒரு எருமை மாட்டின் விலை, ரூ.3,50,000 முதல் ரூ.10 லட்சம் வரை உள்ளது. ஆனால் சிங்கத்தின் விலையோ ரூ. 1,50,000 என நிர்ணயிக்கப்பட்டுள்ளது. இதன் அடிப்படையில் பார்க்கையில் எருமை மாட்டின் விலையை விட சிங்கத்தின் விலை பல மடங்கு குறைவு ஆகும்.

3 பெண் சிங்கங்கள்

இந்த சிங்கங்கள் அடுத்த மாதம் முதல் வாரத்தில் விற்பனைக்கு வர உள்ளதாகத் தெரிகிறது. மொத்தம் 12 சிங்கங்களை விற்க, லாகூர் சஃபாரி மிருகக்காட்சிசாலை நிர்வாகம் திட்டமிட்டுள்ளதாகவும், அதில் முதலில் மூன்று பெண் சிங்கங்கள் தற்போது விற்பனைக்கு வந்துள்ளதாகவும் கூறப்படுகிறது.

பராமரிக்க இயலவில்லை

தனியார் அல்லது கால்நடை வளர்ப்பு ஆர்வலர்களுக்காக இவ்வளவு குறைவான விலை நிர்ணயிக்கப்பட்டுள்ளதாக செய்திகள் தெரிவிக்கின்றன. 142 ஏக்கரில் அமைந்துள்ள இந்த மிருகக்காட்சி சாலையில், சிங்கங்களைப் பராமரிக்க அதிக செலவு ஆவதால், அவற்றை விற்க முடிவெடுத்துள்ளதாகத் தெரிகிறது. இப்படி சிங்கங்களை விற்பது அந்த மிருகக்காட்சி சாலையில் ஒன்றும் புதிய விசயமில்லை.

ஆண்டுதோறும் விற்பனை

கடந்தாண்டும் இதேபோல், 14 சிங்கங்களை அந்த மிருகக்காட்சி சாலை நிர்வாகம் விற்பனை செய்ததாக தகவல்கள் தெரிவிக்கின்றன. ஆனால் இம்முறை எருமை மாடுகளைவிட குறைவான விலைக்கு, சிங்கங்களின் விலை நிர்ணயிக்கப்பட்டுள்ளதால், இது இணையத்தில் பேசுபொருளாகி இருக்கிறது. குறைந்த விலைக்கு விற்றாலாவது யாராவது வாங்கிச் செல்வார்களா எனப் பார்ப்போம் என இப்படி விலை நிர்ணயித்துள்ளது போலும் அந்த மிருகக்காட்சி சாலை.

English summary

A lion comes cheaper than a buffalo in Pakistan, if some local media reports are to be believed.