குன்மிங் ஏர்லைன்ஸின் "குண்டக்க மண்டக்க" சடங்கு.. போராட்டத்தில் குதித்த சீன விமானப் பணிப்பெண்கள்

Updated: Wednesday, October 14, 2015, 17:54 [IST]

Subscribe to Oneindia Tamil

பீஜிங்: சீனாவில் புதிதாக பணியில் சேரும் பெண் விமான ஊழியர்களுக்கு வரவேற்பு தருகிறோம் என்ற பெயரில் நடத்தப்படும் மோசமான சடங்குக்கு முற்றுப்புள்ளி வைக்கும் முயற்சியில் சீன நாட்டு பிரபல விமான நிறுவனப் பணிப்பெண்கள் தற்போது இறங்கியுள்ளனர்.

சீனாவின் பிரபல விமான நிறுவனமான குன்மிங் ஏர்லைன்ஸில் புதிதாக விமான பணிப்பெண்ணாக பணிபுரிய வருவோரை வித்தியாசமான ஒரு சடங்கின் மூலமாக இதன் பணியாளர்கள் பல ஆண்டுகளாக வரவேற்று வருகின்றனர்.

புதிதாக விமான பணிப்பெண்ணாக பணிபுரிய வரும் பெண்கள் இந்த விமானத்தில் உள்ள பயணிகள் தமது லக்கேஜை வைக்கும் பெட்டியில் அடைத்து வைக்கின்றனர்.

லக்கேஜ் பெட்டிக்குள் அடக்கம்:

புதிய பெண் பணியாளர்களை, ஆண் பணியாளர்கள் இந்த லக்கேஜ் பெட்டிக்குள் படுக்குமாறு பணிக்கின்றனர். சில நேரம் பெட்டியை மூடி விடவும் செய்வார்களாம். பணியில் சேர்ந்த முதல் 30 முதல் 50 மணி நேரத்திற்குள் இந்த "ராக்கிங்" போன்ற செயலில் ஆண் பணியாளர்கள் ஈடுபடுகின்றனராம்.

ஏற்றுக் கொள்ளும் பெண்கள்:

இதை தவிர்க்க முற்படும் பெண்களை திமிர் பிடித்தவள், சரிப்பட்டு வர மாட்டாள் என ஆண் பணியாளர்கள் கருதுவதால் வேறுவழியின்றி சுமார் ஐந்து ஆண்டுகளாக இந்த தண்டனையைப் பல பெண்கள் ஏற்றுக்கொள்கின்றனர்.

சமூக வலைத் தளத்தில் பதிவேற்றம்:

இது தொடர்பாக அலுவலகத்தில் புகாரளித்தும் யாரும் கண்டுகொள்ளாததால் கடந்த வார இறுதியில் சடங்கு என்ற பெயரில் இதுபோல அடைக்கப்படும் பெண்ணின் புகைப்படத்தை சமூக தளத்தில் சில பணிப்பெண்கள் வெளியிட்டனர்.

ஊடகங்கள் முன் மன்னிப்பு:

இது இந்நாட்டு இணையங்களில் தலைப்பு செய்தியாகவே, இந்த விமான நிறுவனத்தின் நிர்வாகிகள் கடந்த திங்களன்று ஊடகங்கள் முன்னர் மன்னிப்பு கேட்க வேண்டிய சூழலுக்கு தள்ளப்பட்டனர்.

நடவடிக்கை எடுக்கப்படும்:

எனினும், இதுவரை இச்சம்பவம் தொடர்பாக விமான பணிப்பெண்களிடமிருந்து எந்த புகாரும் வரவில்லை எனவும், விரைவில் இப்படிச் செய்யும் ஊழியர்கள் மீது நடவடிக்கை எடுக்கப்படும் எனவும், ஊழியர்களின் இந்தக் கூற்று பயணிகளுக்கோ, பயணத்துக்கோ எவ்வித பாதிப்பையும் ஏற்படுத்தாது என தெரிவித்துள்ளனர்.