இஸ்ரேலை மேப்பிலிருந்து நீக்கிய சீன நிறுவனங்கள்! பின்னால் இருக்கும் காரணம் இதுதானா?

பெங்ஜிங்: சீனாவின் பிரபல மற்றும் முன்னணி தொழில்நுட்ப நிறுவனங்களான பைடு, அலிபாபா போன்றவை தங்களின் இணைய வரைபடத்திலிருந்து இஸ்ரேலின் பெயரை நீக்கியுள்ளன.

இஸ்ரேலுக்கும், ஹமாஸ் படையினருக்கும் இடையே அடிக்கடி மோதல் எழுவது இயல்பானதுதான். இப்படி இருக்கையில் 2011க்கு பின்னர் எந்த மோதல் போக்கும் எழவில்லை. ஆனால் கடந்த 7ம் தேதி யாரும் எதிர்பாராத விதமாக ஹமாஸ் படையினர் காசாவிலிருந்து இஸ்ரேல் மீது ராக்கெட்களை வீசி தாக்குதல் நடத்தினர். இஸ்ரேலுக்கு இப்படியான அச்சுறுத்தல் இருப்பது ஏற்கெனவே தெரியும். எனவே அது தனது பாதுகாப்புக்காக 'அயன் டோம்' அமைப்பை உருவாக்கி வைத்திருந்தது. சோகம் என்னவெனில் இந்த வலுவான தடுப்பையும் மீறி ஹமாஸ் ஏவிய ராக்கெட்கள் இஸ்ரேலுக்குள் பாய்ந்தது. இதில் 1,400 பேர் கொல்லப்பட்டனர்.

இதற்கான பதில் தாக்குதலை இஸ்ரேல் பாதுகாப்புப்படை தொடங்கியுள்ளது. ஹமாஸை அழிப்பதாக கூறி கடந்த 24 நாட்களாக இஸ்ரேல் விமானப்படை கடுமையான தாக்குதலை தொடுத்து வந்தது. 25வது நாளாக இன்றும் இது நீடிக்கிறது. இந்த கொடூர தாக்குதலில் 8,306 பாலஸ்தீன மக்கள் கொல்லப்பட்டிருக்கிறார்கள். கடந்த 26ம் தேதி வரை வான் வழி தாக்குதலில் ஈடுபட்டிருந்த இஸ்ரேல் அதன் பின்னர் தரைவழி ஊடுருவலை தொடங்கியது. போர் தீவிரமடைந்த நிலையில் சமாதான பேச்சுவார்த்தை தொடங்க வேண்டும் என உலக நாடுகள் வலியுறுத்தின.

போர் நிறுத்தம் குறித்து ஏற்கெனவே ஐநா பாதுகாப்பு கவுன்சிலில் ரஷ்யா கொண்டு வந்த தீர்மானங்கள் அனைத்தையும், அமெரிக்கா தனது வீட்டோ அதிகாரத்தை பயன்படுத்தி ஒன்றும் இல்லாமல் ஆக்கிவிட்டது. போர் விஷயத்தை பொறுத்த அளவில் ரஷ்யாவும், சீனாவும் ஒரே கோட்டில்தான் பயணித்து வருகிறது. ரஷ்யாவின் ஒவ்வொரு ஐநா பாதுகாப்பு கவுன்சில் தீர்மானத்திற்கும் சீனா ஆதரவளித்து வருகிறது. அதேபோல ஹமாஸுக்கு எதிராக தற்காத்துக் கொள்ள இஸ்ரேலுக்கு உரிமை உண்டு என்று கூறிய சீன அதிபர் ஜி ஜின்பிங், போரை உடனடியாக நிறுத்த வேண்டும் என்றும் வலியுறுத்தினார்.

மேலும் பாலஸ்தீன பிரச்சினைக்கு கூடிய விரைவில் ஒரு விரிவான, நியாயமான மற்றும் நீடித்த தீர்வுக்கு எகிப்து மற்றும் அரபு நாடுகளுக்கு அழுத்தம் கொடுக்க சீனா முன்வந்தது. சர்வதேச சமூகம் ஒரு கூட்டுப் படையை உருவாக்கி பாலஸ்தீன மக்களுக்கு மனிதாபிமான ஆதரவை வழங்க வேண்டும் என சீனாவின் மத்திய கிழக்கு தூதர் ஜாய் ஜுன் கூறியிருந்தார். இப்படி இருக்கையில் சீனாவின் முன்னணி தொழில்நுட்ப நிறுவனங்கள் சில தங்களின் இணைய வரைபடத்திலிருந்து இஸ்ரேலின் பெயரை நீக்கியுள்ளன.

சீனாவில் கூகுள் மேப் எல்லாம் எடுபடாது. அங்கு 'பைடு' ஆப்தான் எல்லாம். நம்மூரில் கூகுளை போல பைடு சீனாவில் அனைத்து இணைய சேவைகளையும் வழங்கி வருகிறது. இப்படி இருக்கையில், இந்த நிறுவனத்தின் மேப்பில் இஸ்ரேலின் பெயர் நீக்கப்பட்டிருக்கிறது. இஸ்ரேலுக்கும் பாலஸ்தீனத்திற்கும் இடையேயுள்ள எல்லையை இந்த மேப் தெளிவாக காட்டுகிறது. ஆனால் இஸ்ரேல் எனும் பெயரை மட்டும் காணோம். அதேபோல சீனாவின் மிகப்பெரிய மல்டி மில்லியனர் நிறுவனமான அலிபாபாவின் இணைய வரைபடத்திலும் இஸ்ரேலின் பெயர் இல்லை. இது குறித்து இரண்டு நிறுவனங்களும் தற்போது வரை அதிகாரப்பூர்வ விளக்கமளிக்கவில்லை.

அலிபாபாவின் வரைபடத்தில், 'லக்சம்பர்க்' போன்ற சிறிய நாடுகள் கூட தெளிவாகக் குறிக்கப்பட்டுள்ளன. ஆனால் இஸ்ரேல் இல்லை. ஏற்கெனவே இஸ்ரேலை ஐக்கிய அரபு அமீரகம் தவிர ஒரேயொரு அரபு நாடுகள் கூட ஏற்றுக்கொள்ளவில்லை. இப்படி இருக்கையில் சீன நிறுவனங்களும் தங்களது மேப்பிலிருந்து இஸ்ரேலை காலி செய்திருப்பது பெரும் விவாதமாக எழுந்திருக்கிறது.

English summary

China's famous and leading tech companies have removed Israel's name from their Online map. It is noteworthy that China had already voted in favor of the resolution against Israel in the UN Security Council.