கேமராவைத் திருடிய கழுகு 110 கிமீ படம் பிடித்தபடி பறந்த வினோதம்...

சிட்னி: முதலைகளைக் கண்காணிப்பதற்காக வைக்கப்பட்டிருந்த சிறிய கேமராவை தூக்கிச் சென்ற கழுகு ஒன்று, அதனை சுமார் 110கிமீ தூரம் தள்ளி கீழே போட்டுச் சென்ற வேடிக்கைச் சம்பவம் ஆஸ்திரேலியாவில் நடந்துள்ளது.

பொதுவாக வானில் வட்டமிடும் கழுகைத் தான் சிலர் வீடியோ எடுப்பார்கள், ஆனால் அந்த கழுகே வீடியோகிராபராக மாறி வீடியோ எடுத்த வினோதம் நடந்துள்ளது.

ஆஸ்திரேலியாவில் முதலைகளைக் கண்காணிப்பதற்காக வைக்கப் பட்ட கேமராவைத் தூக்கிச் சென்று தான் தனது ஒளிப்பதிவு திறமையைக் காட்டியுள்ளது அந்தக் கழுகு.

முதலைகளைக் கண்ண்காணிக்க....

ஆஸ்திரேலியாவில் மார்க்கரெட் ஆற்று பகுதியில் முதலைகளை கணக்கிடுவதற்காக சென்சார் பொருத்தப்பட்ட கேமராவை வைத்திருந்தனர் வன ஆர்வலர்கள். சுமார் 10 முதல் 15 செ.மீ. நீளமும், 5 செ.மீ. அகலமும் கொண்ட இந்தக் கேமரா, நீரில் விழுந்தாலும் பாதிக்காமல் இயங்க கூடிய திறனைப் பெற்றது.

மாயமான கேமரா...

இந்நிலையில், திடீரென சில தினங்களுக்கு முன்னர் அந்தக் கேமரா மாயமானது. கேமரவைத் தேடும் பணியில் ஈடுபட்ட வனத்துறை அதிகாரிகள் சுமார் 110கிமீ தாண்டி கேமரா கிடப்பதைக் கண்டறிந்தனர்.

பதிவான காட்சிகள்...

வனப்பகுதிக்குள் மேரி ஆற்றின் அருகே கிடந்த அந்த கேமராவை கைப்பற்றிய அதிகாரிகள், அவற்றில் காட்சிகள் பதிவாகியிருப்பதைக் கண்டு ஆச்சர்யமடைந்தனர். அதில் பதிவாகியிருந்த காட்சிகளை ஆய்வு செய்த போது, கேமராவை கழுகு ஒன்று தூக்கிச் சென்றது தெரிய வந்தது.

தூக்கிச் சென்ற கழுகு....

இந்த வினோதச்சம்பவம் குறித்து வனத்துறை அதிகாரி ரோனெய்ல் ஸ்கீன் கூறியதாவது,'கேமரா திருடு போனது குறித்து ஆய்வு நடத்தினோம். அதன்பின் 110 கி.மீ. தொலைவில் மேரி ஆற்றின் அருகே கிடந்த கேமராவை கண்டுபிடித்தோம். அதில் பதிவாகி இருந்த காட்சிகளை பார்வையிட்ட போதுதான் கழுகு தூக்கி சென்றது தெரிந்தது' எனத் தெரிவித்துள்ளார்.

வீடியோகிராபர்...

கழுகு எவ்வாறு, எதற்காக கேமராவைத் தூக்கிச் சென்றது எனத் தெரியவில்லை. ஆனால், கழுகிடம் சிக்கிய கேமரா செயலிழக்காமல், தன் பணியினைச் செவ்வனே செய்துள்ளது. ஆம், கேமராவில் கழுகு பயணம் செய்த 110 கி.மீ. தூரமும், காட்சிகளாக பதிவாகியுள்ளது.

English summary

A brazen bird snatched a video camera that was recording crocodiles in northwest Australia and captured fascinating footage of its 110-kilometer (70-mile) journey across the country's remote landscape.