இந்தியாவை தொடர்ந்து.. அமெரிக்காவுக்கு பார்சல் சேவையை ரத்து செய்த ஐரோப்பிய நாடுகள்! சிக்கலில் டிரம்ப்

பாரிஸ்: சுங்க வரி அதிகரிப்பு காரணமாக அமெரிக்காவுக்கான போஸ்டல் பார்சல் சேவைகளை இந்தியா நிறுத்தியிருக்கிறது. தற்போது இந்தியாவை தொடர்ந்து ஐரோப்பிய நாடுகளும் இதேபோல பார்சல் சேவைகளை நிறுத்தியிருக்கின்றன. இதனால் அமெரிக்கா சிக்கலை எதிர்கொண்டிருக்கிறது.

அமெரிக்க அரசு 'டி மினிஸ்' என்கிற ஒப்பந்தத்தை செயல்படுத்தி வந்தது. இதன் மூலம் ஏற்றுமதிக்கு கட்டண விலக்கு கொடுக்கப்பட்டு வந்தது. இது இன்றுடன் முடிவடைகிறது. இதற்கு மாற்றாக புதிய ஒப்பந்தத்தை அமெரிக்கா இன்று முதல் அமல்படுத்தியிருக்கிறது. இது அஞ்சல் போக்குவரத்து சேவைகளில் ஏற்படுத்தும் தாக்கம் குறித்து நிச்சயமற்ற தன்மையே நிலவுகிறது. எனவே எனவே இந்தியா தொடங்கி ஐரோப்பிய நாடுகள் என மொத்தம் 30 நாடுகள் அமெரிக்காவுக்கான அஞ்சல் பார்சல் சேவையை நிறுத்தியிருக்கின்றன.

'டி மினிஸ்' என்கிற ஒப்பந்தம் அமலில் இருந்த போது ரூ.70,500 மதிப்புக்கு குறைவாக உள்ள பார்சல் பொருட்களுக்கு ஏற்றுமதி வரி விலக்கு அளிக்கப்பட்டு வந்தது. ஆனால் தற்போது ஒப்பந்தம் முடிவடைந்திருப்பதால் பல நாடுகளும் தங்கள் பார்சல் சேவையை நிறுத்திருக்கின்றன.

கடந்த ஆண்டு மட்டும் ரூ.11,999 கோடி அளவிலான அஞ்சல் பார்சல்களை, 'டி மினிஸ்' ஒப்பந்தத்தின் கீழ் இந்தியா அமெரிக்காவுக்கு அனுப்பி வைத்திருக்கிறது. தற்போது இந்த சேவையை இந்தியா நிறுத்தியிருக்கிறது. இந்தியா தவிர, ஆஸ்திரேலியா, ஆஸ்திரியா, பெல்ஜியம், பல்கேரியா, சைப்ரஸ், செக் குடியரசு, டென்மார்க், எஸ்டோனியா, பிரான்ஸ், ஜெர்மனி, கிரீஸ், இத்தாலி, ஜப்பான், லாட்வியா, லீச்டன்ஸ்டைன், லிதுவேனியா, மால்டா, மால்டோவா, மாண்டினீக்ரோ, நார்வே, போலந்து, போர்ச்சுகல், செர்பியா, சிங்கப்பூர், ஸ்லோவேனியா, தென் கொரியா, ஸ்பெயின், ஸ்வீடன், சுவிட்சர்லாந்து, தைவான், தாய்லாந்து ஆகிய நாடுகளும் தற்போது அமெரிக்காவுக்கான அஞ்சல் பார்சல் சேவையை நிறுத்தியிருக்கின்றன.

இதில் பெரும்பாலான நாடுகள் அமெரிக்காவின் நட்பு நாடுகளாகும். ஜெர்மனியில் டாய்ச் போஸ்ட் என்கிற பெயரில் டி.எச்.எல் பார்சல் சேவையை வழங்கி வருகிறது. இந்த டாய்ச் போஸ்ட், கடந்த 22ம் தேதி முதல் அமெரிக்காவுக்கான பார்சல் சேவையை நிறுத்திவிட்டது. ஜப்பான் போஸ்ட் கடந்த 25ம் தேதி இந்த அறிவிப்பை வெளியிட்டிருந்தது.

ஆனால் தென் கொரிய அஞ்சல் சேவையான யு.பி.எஸ், அமெரிக்காவுக்கு பார்சல்களை அனுப்பி வருகிறது. அதேபோல ஆஸ்திரேலியாவில் ஃபெட்எக்ஸ் நிறுவனமும், நியூசிலாந்து அஞ்சல் சேவை நிறுவனமும் அமெரிக்காவுக்கான தங்களது பார்சல் சேவையை தொடர்ந்து மேற்கொண்டு வருகிறது.

English summary

European Postal Services Suspend: Major European postal services have suspended parcel shipments to the United States. The decision comes amidst confusion and uncertainty surrounding new US tariff regulations, causing significant disruption to international e-commerce and trade.