இந்தியாவுக்கு "பேசிக்ஸ்" கிடையாது.. கடுப்பில் "ப்ரீ"யை ரத்து செய்த பேஸ்புக்!

Updated: Friday, February 12, 2016, 14:38 [IST]

Subscribe to Oneindia Tamil

கலிபோர்னியா: பேஸ்புக் நிறுவனம் தனது ப்ரீ பேசிக்ஸ் சேவையை இந்தியாவில் நிறுத்துவதாக அறிவித்துள்ளது. மத்திய அரசின் டிராய் அமைப்பு, இணைய சமநிலைக்கு ஆதரவாக முடிவெடுத்திருப்பதால், ப்ரீ பேசிக்ஸை நிறுத்தி விட்டது பேஸ்புக்.

பேஸ்புக் நிறுவனத்தின் ப்ரீ பேசிக்ஸ் சேவை பெரும் சர்ச்சைகளையும், விவாதத்தையும் கடந்த ஆண்டு ஏற்படுத்தியது. இணையச் சமநிலைக்கு இதனால் பெரும் பங்கம் வரும் என்று எதிர்ப்புகள் கிளம்பின.

இந்த நிலையில் இணையச் சமநிலையை உறுதி செய்யும் வகையில் டிராய் சமீபத்தில் ஒரு அறிவிப்பை வெளியிட்டது. அதன்படி இணையதளம் வாயிலாக வழங்கப்படும் சேவைகள் அனைத்தும் ஒரே மாதிரியாக கருதப்படும். ஒவ்வொன்றையும் வித்தியாசப்படுத்திப் பார்க்க கூடாது என்று கூறி விட்டது டிராய்.

பேஸ்புக்குக்கு அடி

இந்த முடிவு பேஸ்புக் நிறுவனத்திற்கு அதிர்ச்சியை ஏற்படுத்தியுள்ளது. இதையடுத்து தனது ப்ரீ பேசிக்ஸ் சேவை திட்டத்தை அது இந்தியாவில் நிறுத்துவதாக அறிவித்துள்ளது.

இந்தியாவில் கிடைக்காது

இதுகுறித்து பேஸ்புக் செய்தித் தொடர்பாளர் விடுத்துள்ள அறிக்கையில், இந்தியாவில் உள்ளவர்களுக்கு இனிமேல் ப்ரீ பேசிக்ஸ் கிடைக்காது என்று விளக்கியுள்ளார்.

ப்ரீ பேசிக்ஸ் திட்டம்

ப்ரீ பேசிக்ஸ் திட்டம் என்பது பேஸ்புக்கின் சேவைகளை இலவசமாக பெறுவது என்பதாகும். ஆனால், இதில் இணைந்தால், வாடிக்கையாளர்களுக்கு குறிப்பிட்ட இணையதளங்களை மட்டுமே இலவசமாக பார்க்க முடியும். பல தளங்களை நாம் இலவசமாக பெற முடியாது.

சுதந்திரத்தைப் பறிக்கும் செயல்

ஆனால் இது அனைத்து இணையதளங்களையும் பார்க்க விடாமல் தடுக்கும் செயல் என்று எதிர்ப்புகள் கிளம்பின. அடிப்படை உரி்மையை, சுதந்திரத்தை மீறும் செயல் இது என்றும் எதிர்ப்புகள் கிளம்பின.

ரிலையன்ஸுடன் இணைந்து

ரிலையன்ஸின் ஆர்காம் மூலமாக இந்தத் திட்டத்தை செயல்படுத்த பேஸ்புக் திட்டமிட்டிருந்தது. ஆனால் கட்டண பாரபட்சம் காரணமாக் அதற்கு டிராயில் தடை போட்டதால் கடந்த டிசம்பர் மாதத்தில் இது நிறுத்தி வைக்கப்பட்டிருந்தது. தற்போது பேஸ்புக் நிறுவனம் இதை கைவிட்டுள்ளது.