விமான தேடலின்போது நாங்களும் இந்திய பெருங்கடலில் பொருட்களை பார்த்தோம்: பிரான்ஸ்

கோலாலம்பூர்: விமானத்தை தேடியபோது இந்திய பெருங்கடலில் பொருட்கள் கிடந்ததற்கான செயற்கைக்கோள் புகைப்படங்கள் கிடைத்துள்ளதாக பிரான்ஸ் மலேசியாவிடம் தெரிவித்துள்ளது.

மாயமான மலேசிய விமானம் தெற்கு இந்திய பெருங்கடல் பகுதியில் விபத்துக்குள்ளாகி விழுந்திருக்கலாம் என்ற சந்தேகம் வலுத்து வருகிறது.

தெற்கு இந்திய பெருங்கடலில் 2 பொருட்களை பார்த்ததாகவும், அவை விமான பாகங்களாக இருக்கும் என்றும் ஆஸ்திரேலியா தெரிவித்தது. இதையடுத்து சீனாவும் அதே பகுதியில் நீளமான பொருளை பார்த்ததாக தெரிவித்தது. சீன செயற்கைக்கோள் அனுப்பிய புகைப்படத்தில் உள்ள பொருள் போயிங் 777 ரக விமானத்தின் இறக்கையாக இருக்கும் என்று ஆஸ்திரேலிய நிபுணர் தெரிவித்துள்ளார்.

இந்நிலையில் அதே தெற்கு இந்திய பெருங்கடல் பகுதியில் பொருட்கள் மிதந்ததற்கான செயற்கைக்கோள் புகைப்படங்கள் கிடைத்துள்ளதாக பிரான்ஸ் மலேசியாவிடம் தெரிவித்துள்ளது. அந்த பொருட்கள் மாயமான விமானத்தின் பாகங்களாக இருக்கும் என்று கூறப்படுகிறது.

தெற்கு இந்திய கடற்பகுதியில் தான் தற்போது மாயமான விமானத்தை தேடும் பணி தீவிரமாக நடந்து வருகிறது என்பது குறிப்பிடத்தக்கது.

English summary

France told Malaysia that it had satellite images of objects in the southern Indian ocean which could be from the missing Malaysian plane.