பிரான்ஸில் விழுந்து நொறுங்கிய விமானத்தின் கருப்பு பெட்டி கண்டுபிடிப்பு

By Siva

Published: Wednesday, March 25, 2015, 9:33 [IST]

Subscribe to Oneindia Tamil

பாரீஸ்: பிரான்ஸின் ஆல்ப்ஸ் மலைப்பகுதியில் விழுந்து விபத்துக்குள்ளான விமானத்தில் இருந்த 150 பேரும் பலியாகியுள்ளனர். மேலும் விமானத்தின் கருப்பு பெட்டி கண்டுபிடிக்கப்பட்டுள்ளது.

லுப்தான்சா நிறுவனத்திற்கு சொந்தமான ஜெர்மன் விங்ஸ் நிறுவன விமானம் 144 பயணிகள், 6 விமான ஊழியர்களுடன் ஸ்பெயினில் உள்ள பார்சிலோனாவில் இருந்து ஜெர்மனியில் இருக்கும் டுசல்டார்ப் நகருக்கு செவ்வாய்க்கிழமை கிளம்பியது.

விமானம் பிரான்ஸின் ஆல்ப்ஸ் மலைப் பகுதியில் விழுந்து நொறுங்கி விபத்துக்குள்ளானது. இதில் விமானத்தில் இருந்த அனைவரும் பலியாகிவிட்டதாக அறிவிக்கப்பட்டுள்ளது.

கருப்பு பெட்டி

ரிவியரா நகரில் இருந்து 100 கிலோமீட்டர் தொலைவில் உள்ள இடத்தில் விமானத்தின் கருப்பு பெட்டி கண்டுபிடிக்கப்பட்டுள்ளது.

வேகம்

விமானம் விபத்துக்குள்ளாக 15 நிமிடங்களுக்கு முன்பு அதன் வேகம் வெகுவாக குறைந்தது தெரிய வந்துள்ளது.

விமானம்

பெரிய விமானம் ஒன்று கீழே விழுந்து நொறுங்கியதை பார்த்தோம். அதில் பயணித்தவர்களின் உடல்கள் கூற முடியாத அளவுக்கு சேதம் அடைந்துள்ளது என்று சம்பவத்தை நேரில் பார்த்த ஒருவர் தெரிவித்துள்ளார்.

பள்ளிக் குழந்தைகள்

விமானத்தில் 16 பள்ளிக் குழந்தைகள், 2 ஆசிரியர்கள் இருந்துள்ளனர். விமானத்தில் ஜெர்மனியைச் சேர்ந்த 67 பேரும், ஸ்பெயினைச் சேர்ந்த 45 பேரும், பெல்ஜியத்தைச் சேர்ந்த ஒருவரும் இருந்துள்ளனர்.

பாடகர்கள்

கஜகஸ்தானைச் சேர்ந்த பாடகர் ஓலேக் ப்ரிஜாக் மற்றும் ஜெர்மனியைச் சேர்ந்த பாடகி மரியா ராட்னர் ஆகியோரும் விபத்தில் பலியாகியுள்ளனர்.

ஏ320

விபத்துக்குள்ளான விமானம் ஏர்பஸ் ஏ320 ரகத்தைச் சேர்ந்தது. அந்த விமானத்தை லுப்தான்சா கடந்த 1991ம் ஆண்டு வாங்கியுள்ளது. 24 ஆண்டுகள் செயல்பாட்டில் இருந்த விமானம் விபத்துக்குள்ளாகியுள்ளது.