ஆம், இந்தியாவிற்கு எதிராக பயன்படுத்தவே அணு ஆயுத தயாரிப்பு... முதன்முறையாக ஒப்புக் கொண்டது பாகிஸ்தான்

இஸ்லாமாபாத்: இந்தியாவுக்கு எதிரான போரில் பயன்படுத்தவே அணு ஆயுதங்கள் தயாரிக்கப் பட்டதாக முதன்முறையாக பாகிஸ்தான் ஒப்புக் கொண்டுள்ளது.

தீவிரவாத ஒழிப்புக்கு, அமெரிக்கா உள்ளிட்ட நாடுகள் வழங்கும் நிதியை அணு ஆயுத தயாரிப்புக்கு பயன்படுத்துவதாக பாகிஸ்தான் மீது சர்வதேச அளவில் குற்றச்சாட்டு எழுந்துள்ளது. இந்நிலையில், அந்நாடு அணு ஆயுத குவிப்பில் ஈடுபட்டு வருவதை, அந்நாட்டு வெளியுறவுத் துறை செயலாளர் அஜீஸ் சவுத்ரி ஒப்புக் கொண்டுள்ளார்.

மேலும், அமெரிக்கா செல்லும் பாகிஸ்தான் பிரதமர் நவாஷ் ஷெரீப் வரும் 22-ம் தேதி பராக் ஒபாமாவை சந்தித்து பேசுகிறார். அப்போது அணுசக்தி ஒப்பந்தத்தில் கையெழுத்திடுமாறு பாகிஸ்தானை ஒபாமா வலியுறுத்துவார் என எதிர்பார்க்கப்படுகிறது. ஆனால், நவாஸ் ஷெரீப் அணு ஆயுதத்திற்கு எதிரான ஒப்பந்தத்தில் கையெழுத்திடுவார் என்ற தகவலை அஜீஸ் சவுத்ரி மறுத்துள்ளார்.

அதோடு தங்கள் நாட்டின் அணு ஆயுத தயாரிப்பு தற்காப்பிற்காகவே என்று விளக்கம் அளித்துள்ள அஜீஸ், இந்தியாவுடன் போர் புரியும் சூழல் ஏற்பட்டால், அதற்கென்றே சிறப்பு அணு ஆயுதங்களை, தங்கள் நாடு தயாரித்து வைத்துள்ளதாகவும் தெரிவித்துள்ளார்.

சமீபகாலமாக போர் நிறுத்த ஒப்பந்தத்தை மீறி இந்திய முகாம்கள் மீது பாகிஸ்தான் தாக்குதல் நடத்தி வருகிறது. இந்நிலையில், அந்நாட்டு வெளியுறவுத்துறை செயலாளர் இவ்வாறு கூறியிருப்பது பரபரப்பை ஏற்படுத்தியுள்ளது.

English summary

For the first time, a senior Pakistan official has gone on record and admitted that Pakistan has made low-yield nuclear weapons to counter India. Briefing the Pakistani media in Washington on Prime Minister Nawaz Sharif's US visit, Foreign Secretary Aizaz Chaudhry gave a rare explanation of Pakistan's decision to make tactical nuclear weapons to deal with India.